Nuqsonli tovar iste’molchi talab qo‘ygan kundan e’tiboran yetti kun ichida almashtirib beriladi

Amaldagi qonunchilikka ko‘ra, uzoq muddat foydalaniladigan barcha turdagi tovarlarga ishlab chiqaruvchi kafolat muddati belgilashi, kafolat muddati mobaynida tovarning, shu jumladan, butlovchi buyumlarning normal ishlashini (qo‘llanilishini, ulardan foydalanilishini) ta’minlashi shartdir. Tovarda kafolat muddati mobaynida nuqsonlar aniqlangan holatida esa iste’molchida bir qator huquqlar bo‘lib, shulardan biri nuqsonli tovarni maqbul sifatdagisiga almashtirib olishdir.

Rishton tumani «Guliston» mahalla fuqarolar yig‘ini hududida yashovchi Sh.O. Bag‘dod tumanida maishiy texnikalar savdosi faoliyatini olib borayotgan do‘kondan «Ferre» rusumli gaz plitasini 2 400 000 so‘m sotib olib, xonadonida foydalanishi jarayonida plitaning duxovkasida nuqson mavjudligi, u yaxshi ishlamasligi ma’lum bo‘lgan. Sotuvchi bilan telefon orqali muloqotdan esa natija chiqara olmagan. Shundan so‘ng tuman iste’mochilar huquqlarini himoya qilish jamiyatiga murojaat qilib, nuqsonli tovarni almashtirib berilishida amaliy yordam ko‘rsatilishini so‘ragan. Masalaga tuman jamiyati mutaxassislari aralashuvi bilan nuqsonli ekanligi da’vo qilingan gaz plitasini xuddi shu rusumdagi yangi gaz plitasiga almashtirilib, iste’mlchi muammosi bartaraf etildi.

Shu o‘rinda, iste’molchilarga xarid qilgan tovaringizda uning ishlab chiqarilishiga, tuzilishiga, tarkibiga doir kamchiliklarni yoki boshqa nuqsonlarni aniqlagan taqdiringizda, sotuvchi (ishlab chiqaruvchi) uni ayni shunday markali (modelli, artikulli) tovarga yetti kunlik muddatda, tovar sifatini sotuvchi (ishlab chiqaruvchi) tomonidan qo‘shimcha ravishda tekshirish zarur bo‘lganida esa, Siz talab qo‘ygan paytingizdan e’tiboran yigirma kun ichida almashtirib berilishi shartligini, sotuvchi (ishlab chiqaruvchi)larga esa ana shu muddatlarning o‘tkazib yuborilgan har bir kuni uchun iste’molchiga almashtirilgan tovarni berish bilan bir vaqtda tovar bahosining bir foizi miqdorida neustoyka (penya) to‘lash majburiyati ham yuzaga kelishini eslatib o‘tamiz.

Xusniddin Latipov,
jamiyat mutaxassisi.