30-iyun – Yoshlar kuni muborak bo‘lsin!

Hurmatli yoshlar!

O‘zbekiston iste’molchilar huquqlarini himoya qilish jamiyatlari federatsiyasi Farg‘ona viloyat hududiy birlashmasi jamoasi Sizlarni 30-iyun – Yoshlar kuni bilan samimiy muborakbod etadi!

Yurtimizda Yoshlar kunining keng nishonlanishi davlatimiz tomonidan yosh avlodni har tomonlama qo‘llab-quvvatlash, ularning bilim olishi, kasb-hunar egallashi, zamonaviy tashabbuslarini ro‘yobga chiqarishi hamda jamiyat va davlat boshqaruvidagi faolligini oshirishga qaratilayotgan yuksak e’tiborning yaqqol ifodasidir.

Bugungi kunda yoshlar mamlakatimiz taraqqiyotining eng katta tayanchi, yangi g‘oya va tashabbuslarning muallifi, Vatan ravnaqi yo‘lida fidoyilik bilan xizmat qilayotgan kuch sifatida jamiyat hayotining barcha jabhalarida munosib o‘rin egallab kelmoqda. Ularning intilishi, shijoati va mas’uliyati Yangi O‘zbekiston taraqqiyotining muhim omillaridan biri hisoblanadi.

Ayniqsa, iste’molchilik madaniyatini yuksaltirish, iste’molchilar huquqlarini himoya qilish tizimini takomillashtirish hamda iste’molchilik ijtimoiy harakatini yanada keng quloch yoyish jarayonida yoshlarning o‘rni beqiyosdir. Huquqiy bilimga ega, tashabbuskor va faol yoshlar aholining iste’molchilik madaniyatini oshirish, fuqarolarning qonuniy manfaatlarini himoya qilish, sohaga oid qonunchilik mazmun-mohiyatini keng targ‘ib etish hamda huquqbuzarliklarning oldini olishga munosib hissa qo‘shmoqda.

Shuningdek, yoshlarning sohaga oid qonunchilik ijrosi ustidan samarali jamoatchilik nazoratini amalga oshirish, iste’molchilar murojaatlariga befarq bo‘lmaslik, dolzarb muammolarni aniqlash va ularning yechimiga ko‘maklashish borasidagi faolligi jamiyatimizda adolat va qonun ustuvorligini ta’minlashga xizmat qilmoqda. Sizlarning tashabbuslaringiz, zamonaviy bilim va innovasion yondashuvlaringiz iste’molchilar manfaatlarini ishonchli himoya qilish tizimini yanada mustahkamlashda muhim ahamiyat kasb etadi.

Aziz yoshlar!

Sizlarga mustahkam sog‘lik, cheksiz g‘ayrat-shijoat, yuksak marralar, ilm-fan va mehnat faoliyatingizda ulkan muvaffaqiyatlar tilaymiz. Kelgusida ham Vatanimiz ravnaqi, xalqimiz farovonligi, iste’molchilar huquqlarini himoya qilish tizimini rivojlantirish hamda jamiyatimizda huquqiy madaniyatni yuksaltirish yo‘lida yanada faol va fidoyi bo‘lishingizga ishonamiz.

Yoshlar kuni muborak bo‘lsin! Bayramingiz qutlug‘ va barakali bo‘lsin!