Санаторий ва профилакторийларда хизматлар сифати жамоатчилик назоратида

Фарғона тумани нафақат Фарғона вилояти, балки бутун республика миқёсида ҳам йирик санаторий-курорт ҳудуди сифатида тан олинган. Ҳудуднинг қулай иқлими, шифобахш табиий ресурслари ва замонавий даволаш-соғломлаштириш муассасалари туфайли бу ерга йил давомида юртимизнинг турли ҳудудларидан ҳамда хориждан келувчи меҳмонлар ташриф буюради. Айни пайтда туманда ўнлаб санаторийлар, профилакторийлар, дам олиш масканлари ва соғломлаштириш муассасалари фаолият юритиб, аҳоли ҳамда туристларга турли хизматларни кўрсатиб келмоқда.

Шундан келиб чиққан ҳолда, Ўзбекистон истеъмолчилар ҳуқуқларини ҳимоя қилиш жамиятлари федерациясининг тегишли буйруғи ижросини таъминлаш мақсадида Фарғона туман истеъмолчилар ҳуқуқларини ҳимоя қилиш жамияти мутахассислари томонидан мазкур муассасаларда кенг қамровли жамоатчилик назорати тадбирлари амалга оширилмоқда.

Ўрганишлар давомида санаторий ва профилакторийларда истеъмолчиларга кўрсатилаётган хизматлар сифати, яшаш ва даволаниш учун яратилган шарт-шароитлар, хоналарнинг санитария-гигиена ҳолати, озиқ-овқат билан таъминлаш сифати, тиббий хизматлар кўрсатиш тартиби, дам олувчилар учун хавфсиз муҳит яратилганлиги ҳамда хизматларнинг амалдаги қонунчилик талабларига мувофиқлиги атрофлича баҳоланмоқда.

Шунингдек, муассасаларда хизмат кўрсатиш жараёнида истеъмолчиларга зарур ахборотларнинг тўлиқ тақдим этилиши, хизматлар нархлари ва шартлари ҳақида очиқ маълумотларнинг мавжудлиги, таклиф ва шикоятлар китобининг юритилиши, мурожаатларни қабул қилиш тизими ҳам ўрганилмоқда.

Жамоатчилик назорати тадбирларининг асосий мақсади аҳоли, жумладан мамлакатимиз фуқаролари ва хорижий туристларга кўрсатилаётган санаторий-курорт хизматларининг сифати, хавфсизлиги ва очиқлигини баҳолаш, амалдаги қонунчилик талабларига риоя этилишини ўрганиш, мавжуд муаммо ва камчиликларни аниқлаш ҳамда уларни бартараф этиш юзасидан тегишли таклиф ва тавсиялар ишлаб чиқишдан иборат.

Мониторинг жараёнида муассаса раҳбарлари ва масъул ходимлар билан мулоқотлар ташкил этилиб, Ўзбекистон Республикасининг «Истеъмолчиларнинг ҳуқуқларини ҳимоя қилиш тўғрисида»ги Қонуни талаблари, истеъмолчиларнинг қонуний ҳуқуқларини таъминлаш, хизмат кўрсатиш маданиятини юксалтириш ҳамда мурожаатлар билан ишлаш тизимини янада такомиллаштириш бўйича тушунтириш ишлари ҳам олиб борилмоқда.

Мутахассисларнинг таъкидлашича, санаторий-курорт хизматлари мамлакатимиз туризм салоҳиятини намоён этувчи муҳим йўналишлардан бири ҳисобланади. Шу боис мазкур соҳада хизматлар сифатини мунтазам жамоатчилик назорати асосида баҳолаб бориш, истеъмолчиларнинг қонуний манфаатларини ишончли ҳимоя қилиш ва кўрсатилаётган хизматларни халқаро талаблар даражасига етказиш долзарб вазифалардан бири ҳисобланади.

Шу каби жамоатчилик назорати тадбирлари Фарғона вилоятининг бошқа ҳудудларида ҳам изчил давом эттирилмоқда. Жумладан, Бешариқ туман истеъмолчилар ҳуқуқларини ҳимоя қилиш жамияти мутахассислари томонидан ҳам ҳудудда фаолият юритаётган санаторий ва соғломлаштириш муассасаларида кўрсатилаётган хизматлар сифати, истеъмолчилар учун яратилган шарт-шароитлар, санитария-гигиена талабларига риоя қилиниши ҳамда амалдаги қонунчилик талабларининг бажарилиши юзасидан ўрганишлар олиб борилмоқда. Мониторинглар давомида аниқланган ҳолатлар таҳлил қилиниб, хизматлар сифатини янада ошириш, мавжуд камчиликларни бартараф этиш ва истеъмолчиларнинг қонуний ҳуқуқларини таъминлашга қаратилган таклиф ҳамда тавсиялар ишлаб чиқилмоқда.