Iste’molchiga tovar kafolat muddati mobaynida ega bo‘lgan huquqlari ta’minlab berildi

Farg‘ona shahrida istiqomat qiluvchi fuqaro 7 000 000 so‘mga maishiy texnika sotib olganidan so‘ng kutilmagan muammoga duch keldi. Yangi xarid qilingan mahsulot qisqa vaqt ichida nosoz holatga kelgach, unda tabiiy savol tug‘ildi: «Mahsulotga kafolat muddati belgilangan, xo‘sh, endi nima qilsam to‘g‘ri bo‘ladi?»

Fuqaro bu masalada O‘zbekiston iste’molchilar huquqlarini himoya qilish jamiyatlari federatsiyasining Farg‘ona shahar jamiyatiga murojaat qildi. Jamiyat xodimlari murojaatni qabul qilib, uni joyiga chiqqan holda o‘rgandi hamda sotuvchi bilan muloqot o‘tkazdi. O‘rganish jarayonida texnik nosozlikning kelib chiqish sabablari aniqlashtirildi va mahsulotga kafolat xizmatini qo‘llash masalasi ko‘rib chiqildi.

Murojaat asosida jamiyat mutaxassislari savdo ob’ekti rahbariyati bilan hamkorlikda vaziyatni o‘rganib chiqdi. Natijada nosoz mahsulot bo‘yicha servis xizmati jalb etildi va muammoni bartaraf etish choralari ko‘rildi. Bu esa iste’molchining haqli e’tirozi inobatga olinganini ko‘rsatadi.

O‘zbekiston Respublikasining «Iste’molchilarning huquqlarini himoya qilish to‘g‘risida»gi Qonuniga muvofiq, agar tovarda kafolat muddati ichida nuqson aniqlansa, iste’molchi quyidagi huquqlarga ega:

— nuqsonni bepul bartaraf etishni talab qilish;
— tovarni aynan shunday sifatlisiga almashtirish;
— xarid narxini mutanosib ravishda kamaytirish;
— shartnomani bekor qilib, to‘langan pulni qaytarib olish.

Muhimi, mazkur talablarni amalga oshirish uchun iste’molchida mahsulotni xarid qilganini tasdiqlovchi hujjatlar saqlangan bo‘lishi maqsadga muvofiq.

Ko‘plab iste’molchilar nosoz mahsulotga duch kelganda qaerga murojaat qilishni bilmasligi sababli o‘z haqini talab qilmaydi. Aslida esa qonun iste’molchi manfaatini himoya qiladi. Muhimi, huquqiy yordamdan to‘g‘ri foydalanish va vakolatli tashkilotlarga o‘z vaqtida murojaat qilishdir.

Farg‘ona shahridagi mazkur murojaat ham shuni ko‘rsatdiki, masalaga huquqiy yondashuv va sotuvchi bilan amaliy muloqot orqali ko‘plab nizolar sudgacha yetib bormasdan hal etilishi mumkin.

Kafolat taloni yoki chek — oddiy qog‘oz emas, balki iste’molchining huquqini himoya qiluvchi muhim hujjatdir. Agar xarid qilgan tovaringizda nuqson aniqlansa, vaqtni boy bermang. Avvalo sotuvchiga murojaat qiling, zarurat tug‘ilganda esa O‘zbekiston iste’molchilar huquqlarini himoya qilish jamiyatlari federatsiyasi va uning hududiy tashkilotlari yordamidan foydalaning.

Huquqingizni biling va uni himoya qilishdan tortinmang!