Кредитга олинган музлаткич нуқсонли чиқди: муаммо истеъмолчи мурожаатидан сўнг ҳал этилди

Маиший техника харид қилишда маҳсулотнинг нархи ёки ташқи кўришигагина эмас, унинг сифати ва кафолат хизматларига ҳам эътибор бериш муҳим. Айниқса, маҳсулот кредит асосида олинган бўлса, харидор учун унинг соз ишлаши янада муҳим аҳамият касб этади.

Олтиариқ туманида яшовчи фуқаро Х. Х. ҳам шундай муаммога дуч келди. У туманда фаолият кўрсатаётган “IDEA CONCEPT GROUP” МЧЖдан кредит асосида муддатли тўлов шарти билан музлаткич харид қилган. Бироқ хариддан кейин маҳсулотда нуқсонлар аниқлангани сабабли истеъмолчи норози бўлиб, Олтиариқ тумани Истеъмолчилар ҳуқуқларини ҳимоя қилиш жамиятига мурожаат қилди.

Жамият мутахассислари мурожаатни ўрганиши давомида истеъмолчи кўрсатган ҳолатлар ўз тасдиғини топди. Масала юзасидан “IDEA CONCEPT GROUP” МЧЖга қарашли савдо дўкони раҳбари ва сотувчиларига истеъмолчилар ҳуқуқларини ҳимоя қилиш тўғрисидаги қонунчилик талаблари тушунтирилди.

Натижада истеъмолчи харид қилган нуқсонли музлаткич сервис хизмати орқали таъмирлаб берилди. Шу билан фуқаронинг мурожаати бўйича муаммо бартараф этилди.

Мазкур ҳолат истеъмолчилар учун муҳим эслатма: маиший техника харид қилинганда шартнома, тўлов ҳужжатлари ва кафолатга оид ҳужжатларни сақлаб қўйиш зарур.

Маҳсулотда кафолат даврида нуқсон аниқланса, аввало сотувчи ёки сервис хизматига мурожаат қилиш, муаммо ҳал этилмаса, истеъмолчилар ҳуқуқларини ҳимоя қилиш ташкилотларидан амалий ёрдам сўраш мумкин.

Энг муҳими, кредитга олинган товар бўлса ҳам, истеъмолчининг сифатли маҳсулот олиш ҳуқуқи сақланиб қолади. Бу воқеада ҳам фуқаронинг мурожаати эътиборсиз қолмади — аниқланган нуқсон бартараф этилиб, музлаткич таъмирланди.