Носоз телефон ўрнига — ишлайдиган телефон

Учкўприк тумани Қўқонбой МФЙ ҳудудида яшовчи фуқаро Қ.Б.нинг HONOR 9 русумли телефони билан боғлиқ муаммоси унинг мурожаати ортидан ижобий ҳал этилди. Фуқаро мазкур телефонни Олмазор савдо дўконидан 3 миллион 800 минг сўм эвазига харид қилган. Бироқ телефондан кўп ўтмай фойдаланиш жараёнида носозлик юзага келиб, қурилма ишдан чиққан.

Мазкур ҳолат юзасидан фуқаро Федерациянинг ишонч телефони орқали мурожаат қилган. Бағдод туман истеъмолчилар ҳуқуқларини ҳимоя қилиш жамияти мутахассислари мурожаатни ўрганиб, фуқаро иштирокида ҳолатга ойдинлик киритдилар. Ўрганиш давомида телефоннинг носозлиги сабабли истеъмолчининг норозилиги асосли экани аниқланди.

Натижада истеъмолчининг ҳуқуқини тиклаш мақсадида HONOR 9 русумли носоз телефонни таъмирлаш ёки унинг ўрнига 3 миллион 800 минг сўм қийматидаги бошқа, соз ҳолатдаги телефонга алмаштириб бериш масаласи ҳал этилди. Ҳужжатда фуқарога мурожаат натижасидан норози бўлган тақдирда юқори турувчи ташкилотларга мурожаат қилиш ҳуқуқи ҳам тушунтирилган.

Бу ҳолат яна бир муҳим жиҳатни кўрсатади: товарни сотиб олиш билан истеъмолчининг ҳуқуқлари тугамайди. Агар харид қилинган товарда носозлик аниқланса, истеъмолчи ўз ҳуқуқларини ҳимоя қилиш ва қонунчиликда белгиланган тартибда талаб қўйиш имкониятига эга.

Шунинг учун телефон, маиший техника ёки бошқа қимматбаҳо товар харид қилаётганда чек, шартнома, кафолат ҳужжатлари ва бошқа тасдиқловчи ҳужжатларни сақлаб қўйиш, товарда муаммо юзага келганда эса сотувчига мурожаат қилиш муҳим. Зарур ҳолларда истеъмолчилар ҳуқуқларини ҳимоя қилиш ташкилотларига мурожаат қилиш ҳам мумкин.