Интернетдаги харид амалга ошмагани сабабли 300 минг сўм истеъмолчига қайтарилди

Бугун ижтимоий тармоқлар орқали маҳсулот буюртма қилиш кундалик ҳаётимизнинг бир қисмига айланди. Бир неча дақиқада товар танлаш, пул ўтказиш ва буюртмани уйдан чиқмасдан қабул қилиш мумкин. Аммо бу қулайлик ортида муайян хавфлар ҳам бор: сотувчини текширмасдан олдиндан тўлов қилиш баъзан истеъмолчини нохуш вазиятга тушириб қўйиши мумкин.

Фарғона туманида истиқомат қилувчи фуқаронинг мурожаати ҳам ана шундай ҳолат билан боғлиқ бўлди.

Ҳужжатларга кўра, фуқаро 2026 йил 18 июн куни ижтимоий тармоқ орқали товар буюртма қилиб, унинг учун 300 минг сўм маблағни банк пластик картасига ўтказган. Аммо буюртма қилинган товарлар белгиланган вақтда етиб келмаган. Натижада истеъмолчи ўз ҳуқуқларини ҳимоя қилиш мақсадида 24 июн куни ички ишлар органларининг қисқа ишонч рақами орқали мурожаат қилган. Мурожаат белгиланган тартибда қайд этилиб, ҳуқуқий баҳо бериш учун ўрганиш бошланган.

Масаланинг эътиборли жиҳати — истеъмолчининг мурожаати ваколат доираси бўйича Ўзбекистон истеъмолчилар ҳуқуқларини ҳимоя қилиш жамиятлари федерациясининг Фарғона вилояти ҳудудий тузилмасига юборилганидир. Фарғона тумани ички ишлар бўлимининг 2026 йил 14 июлдаги хатида фуқаронинг мурожаати келгусида қонуний тартибда кўриб чиқиш ва ҳуқуқий баҳо бериш учун истеъмолчилар ҳуқуқларини ҳимоя қилиш тизимига тақдим этилгани қайд этилган.

Шундан сўнг масала Фарғона туман истеъмолчилар ҳуқуқларини ҳимоя қилиш жамияти ходимлари томонидан атрофлича ўрганилди. Ўрганиш якунлари билан 29 июл куни истеъмолчининг банк пластик картасига 300 000 сўм пул маблағи тўлиқ қайтариб берилиши таъминланди.

Ҳурматли истеъмолчилар!

Онлайн савдода «аввал пулни ўтказинг» деган гапга шошилманг. Чиройли суратлар, арзон нарх ёки сотувчининг ишонарли ваъдаси унинг ҳалол тадбиркор эканини англатмайди. Айниқса, нотаниш шахснинг банк картасига товарни олмасдан туриб тўлиқ маблағ ўтказишда эҳтиёткор бўлиш зарур.

Онлайн харидда сотувчининг кимлиги ва алоқа маълумотларини текшириш, товарнинг нархи ва етказиб бериш шартларини олдиндан аниқлаш, ёзишмаларни ўчириб юбормаслик ҳамда тўловни тасдиқловчи электрон чек ёки скриншотларни сақлаб қўйиш кейинчалик низоли вазият юзага келганда муҳим далил бўлиши мумкин.

Энг асосийси, товар келмаса ёки сотувчи ўз мажбуриятини бажармаса, «пулим кетди» деб масаладан воз кечмаслик керак. Мурожаат қилиш ва қонуний ҳуқуқни талаб этиш амалий натижа бериши мумкин.

Фарғона туманидаги мазкур ҳолат ҳам бунинг бир мисоли бўлди: ижтимоий тармоқ орқали қилинган харид юзасидан келиб чиққан муаммо тегишли идоралар ҳамкорлигида ўрганилиб, якунда истеъмолчига 300 минг сўм маблағ қайтарилди.

Баъзан истеъмолчи ҳуқуқини тиклаш катта суммалар билан эмас, бир қарашда оддий кўринган мурожаатга жиддий ёндашишдан бошланади. Энг муҳими — ҳар бир истеъмолчи ўз ҳақ-ҳуқуқини билиши ва зарур пайтда уни талаб қила олиши керак.