Chevrolet Onix avtomobilidagi nosozlik bartaraf etildi

Iste’molchi tovar sotib olar ekan, uning sifati, xavfsizligi va belgilangan talablarga mos bo‘lishini kutadi. Ayniqsa, yangi avtomobil xarid qilinganda, u zavod talablariga javob berishi va iste’molchiga ortiqcha tashvish tug‘dirmasligi lozim.

Ammo ba’zan eng yangi texnika va transport vositalarida ham nosozliklar uchrab turishi mumkin. Bunday vaziyatda eng muhimi — muammoni hal qilishning qonuniy yo‘lini bilishdir.

Ana shunday murojaatlardan biri Farg‘ona shahrida istiqomat qiluvchi fuqaro Sh.A. tomonidan O‘zbekiston iste’molchilar huquqlarini himoya qilish jamiyatlari federatsiyasining 1091 qisqa raqamli ishonch telefoni orqali yo‘llandi.

Fuqaro yaqinda xarid qilgan Chevrolet Onix avtomobilida akkumulyator (quvvatlash tizimi) bilan bog‘liq nosozlik yuzaga kelganini ma’lum qildi. Murojaat qabul qilinishi bilan Farg‘ona shahar iste’molchilar huquqlarini himoya qilish jamiyati mutaxassislari masalaga zudlik bilan aralashdi.

O‘rganishlar davomida avtomobil sotilgan avtosalon rahbariyati bilan bog‘lanilib, nosozlik haqida ma’lumot berildi. Natijada avtosalon mas’ullari tegishli texnik mutaxassislarni jalb etib, avtomobildagi nosozlikni qisqa muddatda bartaraf etdi. Bu orqali iste’molchining qonuniy manfaatlari ta’minlandi.

E’tiborli jihati shundaki, muammo hal etilgach, murojaatchi Federatsiya tizimi xodimlariga amaliy yordam va tezkor munosabat uchun minnatdorchilik bildirgan. Bu esa murojaatlar bilan ishlash tizimi samarali yo‘lga qo‘yilganini yana bir bor tasdiqlaydi.

Iste’molchilarga tavsiya

Agar avtomobil yoki boshqa texnik mahsulotda nuqson aniqlansa:

— sotib olish hujjatlari va kafolat talonini saqlang;
— nosozlikni mustaqil bartaraf etishga shoshilmang;
— avvalo sotuvchi yoki servis markaziga murojaat qiling;
— muammo hal etilmasa, iste’molchi huquqlarini himoya qiluvchi tashkilotlarga murojaat qilishdan tortinmang.

Har bir murojaat ortida insonning haq-huquqi turadi. Qonuniy va tezkor yondashuv esa ko‘plab muammolarni sudgacha yetkazmasdan hal qilish imkonini beradi.

Eslatma: Iste’mol sohasidagi muammolar yuzasidan O‘zbekiston iste’molchilar huquqlarini himoya qilish jamiyatlari federatsiyasining 1091 qisqa raqamli ishonch telefoni orqali yoki murojaat.istemol.uz elektron platformasi orqali murojaat qilishingiz mumkin.