Kafolat muddati ichida nuqsonlari aniqlangan televizorni maqbul sifatdagisiga almashtirilishi chora-tadbirlari ko‘rildi

Avvalo qonunchilikda belgilab qo‘yilgan kafolat muddati tushunchasi quruq gap emasligini yaxshi anglab olishimiz kerak. Qonunchilik iste’molchilarga qulaylik yaratish maqsadida, hattoki, ishlab chiqaruvchi tomonidan kafolat muddati belgilanmagan uzoq muddat foydalaniladigan (ko‘chmas mulk va mavsumiy tovarlardan tashqari) tovarlarga ham xarid qilingan kunidan boshlab 6 oy ichida kafolat muddati belgilangan tovarlardagi kabi bir xil huquqlarni belgilaydiki, ushbu muddat ichida o‘ziga nuqsonli tovar sotilgan iste’molchi uni almashtirish, xarid narxini tegishincha qayta hisob-kitob qilish, nuqsonlarni bepul bartaraf etib berilishi, shartnomani bekor qilinib, ko‘rilgan zararni qoplab berilishi kabi bir qator huquqlarga ega bo‘ladi.

Yozyovon tumanilik M.N. Qumtepa buyum bozori hududidan 1 yillik kafolati muddati bilan 1 300 000 so‘mga sotib olgan 32 dyum ekranli Samsung rusumli televizordan uch kun davomida foydalanilishi jarayonidayoq uning ekranidagi ranglarda chaplashish, g‘alati tarzda aralashib ketish kabi holatlar kuzatilishni boshlagan. Shundan so‘ng televizor sotuvchiga qaytarib olib kelinib, shu rusumdagi maqbul sifatda bo‘lgan boshqasiga almashtirib berilishi so‘ralgan. Lekin sotuvchi tomonidan qonuniy talabni bajarish chora-tadbirlari ko‘rilmagan. Bundan norozi bo‘lgan iste’molchi Yozyovon tuman Iste’molchilar huquqlarini himoya qilish jamiyatiga ariza bilan murojaat qilgan.

Murojaatni tuman jamiyati mutaxassislari tomonidan o‘rganilishi jarayonida garchi sotuvchi iste’molchi kelgan paytda ushbu rusumdagi televizordan sotuvda qolmaganini, 1-2 kun ichida olib kelingandan so‘ng almashtirib berishini aytib tushuntirish berganligini ma’lum qilgan bo‘lsada, qonunda iste’molchining talablarini bajarish muddatlari aniq belgilab qo‘yilganligi, ularni bajarish shartligi, aks holda muddatlarni o‘tkazib yuborilishi bilan sotuvchiga nisabatan qo‘shimcha huquqiy va moliyaviy ta’sir choralarini ko‘rilishiga sabab bo‘lishi tushuntirilgandan so‘ng, nuqsonli ekanligi da’vo qilingan televizor xuddi shu rusumdagi maqbul sifatdagisi bilan almashtirib berildi.

Shavkatjon Saidov,
jamiyat mutaxassisi.