Сўхда ижтимоий соҳа объектларининг куз-қиш мавсумига тайёргарлиги ҳолатлари ўрганилди

Ҳудудий бирлашма Ишчи гуруҳи томонидан ҳудудда 2025–2026 йиллар куз-қиш мавсумида ижтимоий соҳа объектларининг барқарор ишлашга тайёрлашни таъминлаш бўйича белгиланган чора-тадбирларнинг бажарилиши ҳамда истеъмолчиларга яратилган шароитлар бўйича ўтказилган мониторинг туманда бу борада бир қатор муаммолар мавжудлигини кўрсатди.

Ўрганиш билан танлама асосда қамраб олинган 26 та таълим ва тиббиёт муассасаларининг техник ҳамда санитар ҳолатида тизимли камчиликлар мавжуд. Жумладан, улардаги бинолар техник ҳолатларининг 14 таси қониқарли деб топилган бўлса, қолгани қисман ёки тўлиқ таъмирга муҳтож. Иссиқликни сақлаш учун муҳим бўлган дераза ва эшикларни мавсумга тайёрлаш ҳолати 2 та объектда қониқарсиз ҳолатда эканлиги қайд этилди. Иситиш тизимлари 11 та муассасада фақат қисман ишчи ҳолатида бўлса, биттасида носоз.

Муассалардан 2 тасида ёқилғи таъминотидаги кечикишлар мавжудлиги, ёқилғини сақлаш шароитларининг 15 та ҳолатда талабга қисман жавоб бериши, 1 та ҳолатда эса талабга мос эмаслиги, 11 та объектда хоналар ҳарорати меъёрдан пастлиги соҳада ечимини кутиб турган муаммоларнинг мавжудлигини кўрсатмоқда.

Мониторинг санитария-гигиена борасида ҳам камчиликлар мавжудлигини кўрсатиб берди. Ошхоналарнинг 10 тасида талаблар тўлақонли бажарилмаган, 3 тасида эса талаб даражасида эмас, уларнинг баъзиларида муддати ўтган маҳсулотлар ҳам кузатилди. Ҳожатхоналар, чиқинди ташлаш жойлари ва тозаликка оид талабларда ҳам назоратни етарли даражада деб бўлмайди.

Ёнғин хавфсизлиги воситалари, биринчи тиббий ёрдам шкафлари ва тиббий жиҳозлар билан таъминланишдаги камчиликлар эса болалар ва аҳолининг хавфсизлигига оид хавотирларни кучайтиради. Бундан ташқари, баъзи ходимлар ўз вақтида тиббий кўрикдан ўтмаган.

Мониторинг хулосалари шундан далолат берадики, Сўх туманида ижтимоий объектларнинг куз-қиш мавсумига тайёргарлигини етарли даражада дб бўлмайди. Мазкур камчиликларни бартараф этиш нафақат муассасалар масъуллари, балки маҳаллий ҳокимлик ва тегишли хизматлардан тезкор чораларни талаб қилади.