So‘xda ijtimoiy soha ob’ektlarining kuz-qish mavsumiga tayyorgarligi holatlari o‘rganildi

Hududiy birlashma Ishchi guruhi tomonidan hududda 2025–2026 yillar kuz-qish mavsumida ijtimoiy soha ob’ektlarining barqaror ishlashga tayyorlashni ta’minlash bo‘yicha belgilangan chora-tadbirlarning bajarilishi hamda iste’molchilarga yaratilgan sharoitlar bo‘yicha o‘tkazilgan monitoring tumanda bu borada bir qator muammolar mavjudligini ko‘rsatdi.

O‘rganish bilan tanlama asosda qamrab olingan 26 ta ta’lim va tibbiyot muassasalarining texnik hamda sanitar holatida tizimli kamchiliklar mavjud. Jumladan, ulardagi binolar texnik holatlarining 14 tasi qoniqarli deb topilgan bo‘lsa, qolgani qisman yoki to‘liq ta’mirga muhtoj. Issiqlikni saqlash uchun muhim bo‘lgan deraza va eshiklarni mavsumga tayyorlash holati 2 ta ob’ektda qoniqarsiz holatda ekanligi qayd etildi. Isitish tizimlari 11 ta muassasada faqat qisman ishchi holatida bo‘lsa, bittasida nosoz.

Muassalardan 2 tasida yoqilg‘i ta’minotidagi kechikishlar mavjudligi, yoqilg‘ini saqlash sharoitlarining 15 ta holatda talabga qisman javob berishi, 1 ta holatda esa talabga mos emasligi, 11 ta ob’ektda xonalar harorati me’yordan pastligi sohada yechimini kutib turgan muammolarning mavjudligini ko‘rsatmoqda.

Monitoring sanitariya-gigiena borasida ham kamchiliklar mavjudligini ko‘rsatib berdi. Oshxonalarning 10 tasida talablar to‘laqonli bajarilmagan, 3 tasida esa talab darajasida emas, ularning ba’zilarida muddati o‘tgan mahsulotlar ham kuzatildi. Hojatxonalar, chiqindi tashlash joylari va tozalikka oid talablarda ham nazoratni yetarli darajada deb bo‘lmaydi.

Yong‘in xavfsizligi vositalari, birinchi tibbiy yordam shkaflari va tibbiy jihozlar bilan ta’minlanishdagi kamchiliklar esa bolalar va aholining xavfsizligiga oid xavotirlarni kuchaytiradi. Bundan tashqari, ba’zi xodimlar o‘z vaqtida tibbiy ko‘rikdan o‘tmagan.

Monitoring xulosalari shundan dalolat beradiki, So‘x tumanida ijtimoiy ob’ektlarning kuz-qish mavsumiga tayyorgarligini yetarli darajada deb bo‘lmaydi. Mazkur kamchiliklarni bartaraf etish nafaqat muassasalar mas’ullari, balki mahalliy hokimlik va tegishli xizmatlardan tezkor choralarni talab qiladi.