Коррупцияга қарши кураш ишида фуқаролик жамияти вакилларининг иштироки юзасидан амалий семинар ўтказилди

Коррупцияга қарши самарали курашиш фақат давлат идораларининг вазифаси эмас. Бу жараёнда фуқаролик жамияти институтлари, хусусан, нодавлат нотижорат ташкилотларининг фаол иштироки ҳам муҳим аҳамият касб этади. Шу мақсадда Фарғона шаҳрида нодавлат нотижорат ташкилотлари вакиллари учун коррупцияга қарши курашиш масалаларига бағишланган семинар-тренинг ташкил этилди.

Тадбир Коррупцияга қарши курашиш агентлиги ҳамда «Transparency International Latvia» вакиллари иштирокида ўтказилиб, унда коррупциянинг олдини олишда жамоатчилик назоратини кучайтириш, очиқ маълумотлардан самарали фойдаланиш ва халқаро тажрибани миллий амалиётга татбиқ этиш масалаларига эътибор қаратилди.

Семинар давомида иштирокчилар учун коррупцияга қарши курашишнинг замонавий ёндашувлари бўйича фикр ва тажриба алмашилди.

Коррупцияга қарши курашиш агентлиги Жамоатчилик кенгаши раиси Фозилжон Отахонов, «Transparency International Latvia» вакили Артурс Биковс ҳамда «Transparency International Kyrgyzstan» вакили Айгул Акматжанова эксперт сифатида иштирок этиб, ННТларнинг ушбу йўналишдаги имкониятлари ҳақида маълумот бердилар.

Хусусан, Ўзбекистонда нодавлат нотижорат ташкилотларининг коррупцияга қарши курашиш жараёнларидаги иштироки, жамоатчилик мониторингини ташкил этиш усуллари ҳамда очиқ маълумотлар асосида асосланган хулосалар шакллантириш масалалари муҳокама қилинди.

Бу жараёнда оддий маълумотни йиғишнинг ўзи етарли эмаслиги, уни таҳлил қилиш, солиштириш ва асосланган хулоса чиқариш жамоатчилик мониторингининг муҳим босқичлари эканига алоҳида эътибор қаратилди.

Семинарда коррупцияга қарши курашишнинг халқаро стандартлари, муқобил ҳисоботлар тайёрлаш ва ННТларнинг ушбу жараёнларда иштирок этиш имкониятлари ҳам кўриб чиқилди.

Айниқса, Қирғизистон, Қозоғистон ва бошқа мамлакатларда фуқаролик жамияти институтлари томонидан фуқаролик ҳамда муқобил баҳолашларни тайёрлаш тажрибаси иштирокчилар эътиборига ҳавола этилди.

Халқаро тажрибани ўрганишдан асосий мақсад — хорижий амалиётни тўғридан-тўғри кўчириш эмас, балки самарали механизмларни маҳаллий шароитга мослаштириш ва жамоатчилик назорати имкониятларини кенгайтиришдан иборат.

Тренинг шаклида ташкил этилган тадбир иштирокчиларга назарий маълумотлар билан бир қаторда амалий ёндашувларни ҳам ўзлаштириш имконини берди.

Иштирокчилар коррупцияга қарши курашишда фуқаролик жамиятининг ўрни, жамоатчилик мониторингини самарали ташкил этиш, очиқ маълумотлар билан ишлаш ҳамда халқаро тажрибадан фойдаланиш бўйича билим ва кўникмаларини оширдилар.

Бундай мулоқотлар ННТлар ўртасида тажриба алмашиш, коррупцияга қарши ташаббусларни қўллаб-қувватлаш ва жамоатчилик назоратининг таъсирчан механизмларини ривожлантириш учун муҳим майдон вазифасини ўтайди.

Тадбир якунида «Transparency International Latvia» директорининг ўринбосари Агния Бируле томонидан семинар иштирокчиларига халқаро сертификатлар топширилди.

Эътиборлиси, коррупцияга қарши курашишда давлат, жамият ва фуқаролик институтларининг ҳамжиҳатлиги қанчалик кучли бўлса, жамоатчилик назорати ҳам шунчалик самарали бўлади.