Атторлик-пардоз товарларини харид қилишда нималарга эътибор бериш керак?

Сўнгги йилларда мамлакатимизда атторлик ва пардоз маҳсулотларига бўлган талаб ортиб бормоқда. Бу эса истеъмолчиларни бундай товарларни сотиб олишда янада эҳтиёткор бўлишга ундайди. “Истеъмолчиларнинг ҳуқуқларини ҳимоя қилиш тўғрисида”ги Қонун ҳамда тегишли меъёрий ҳужжатларга кўра, бундай товарлар сифати, таркиби ва сақлаш муддати тўлиқ кўрсатилган ҳолда савдога чиқарилиши шарт.

Мутахассислар таъкидлайдилар: харидор маҳсулот ёрлиғида ишлаб чиқарувчи, таркибий қисмлар ва аллергик таъсирлар ҳақидаги маълумотларни диққат билан ўқиши зарур. Айниқса, атирлар ва крем маҳсулотларини сотиб олишдан аввал уларни синаб кўриш имконияти бўлиши керак. Яхши савдо нуқталарида махсус “тестер” намуналар мавжуд бўлади.

Қизиқарли ҳолат: айрим харидорлар атирни дўконда ёқтириб, уйга боргач ундан кўнгли тўлмайди. Бунга ҳиднинг ҳарорат, ҳаво намлиги ёки тери кимёси билан ўзгариши сабаб бўлади. Шу боис, мутахассислар атирни бир неча соат синаб кўриб кейин харид қилишни маслаҳат беришади.

Хулоса шуки, ҳар бир истеъмолчи ўз танловига жиддий ёндашса, нафақат сифатли, балки соғлом ҳаёт тарзига мос бўлган маҳсулотни танлай олади.

Унутманг: “Ўзбекистон Республикасида чакана савдо қоидалари”га кўра, атторлик-пардоз товарлари зарур сифатда бўлса ва нуқсонлари бўлмаса, сотилгандан сўнг қайтариб олинмайдиган ёки шунга ўхшаш товарга алмаштирилмайдиган товарлар рўйхатига киритилган.

Шахноза Валиева,
Қувасой шаҳар жамияти раиси в.б.