Истеъмолчи ҳисоблагичи билан боғлиқ тушунмовчилик ҳолати бартараф қилинди

Аҳолига кўрсатилаётган коммунал хизматлар сифати ва узлуксизлиги истеъмолчиларни энг кўп ўйлантирадиган масалалардан биридир. Айниқса, ичимлик суви таъминоти билан боғлиқ муаммолар юзага келганда фуқаролар ўз ҳуқуқларини қаерда ва қандай ҳимоя қилишни билмай қолишади. Ана шундай ҳолатлардан бири Тошлоқ туманида истиқомат қилувчи фуқаронинг мурожаати мисолида ўрганилди.

Тошлоқ тумани Юқориқишлоқ МФЙда яшовчи фуқаро Ш. С. Ўзбекистон истеъмолчилар ҳуқуқларини ҳимоя қилиш жамиятлари федерациясининг 1091 ишонч телефони орқали мурожаат қилиб, ичимлик суви ҳисоблагичи соз ҳолатда бўлишига қарамай, сув таъминоти корхонаси ходимлари уни носоз деб баҳолаб, сув тармоғини узиб қўйганидан норози эканини билдирган. Мазкур мурожаат белгиланган тартибда Тошлоқ тумани истеъмолчилар ҳуқуқларини ҳимоя қилиш жамияти томонидан кўриб чиқиш учун қабул қилинди.

Мурожаат келиб тушгач, туман жамияти томонидан фуқаронинг важлари ўрганилди. Шунингдек, масалага аниқлик киритиш мақсадида “Фарғона сув таъминоти” АЖ Тошлоқ туман филиали раҳбариятига расмий сўров юборилди. Корхона мутахассислари иштирокида фуқаронинг ҳолати қайта кўриб чиқилди.

Ўрганиш жараёнида истеъмолчининг ичимлик суви тармоғига уланиш учун зарур ҳужжатлари мавжудлиги, сув таъминоти корхонаси билан тегишли шартнома тузилгани ҳамда ҳисоблагич маълумотлари корхона базасига киритилгани аниқланди. Корхона томонидан мурожаатда кўрсатилган ҳолатлар юзасидан текширув ўтказилиб, тушунмовчилик ҳолати бартараф қилингани ҳамда истеъмолчига вазият бўйича тушунтириш берилгани маълум қилинди.

Мазкур ҳолат яна бир бор шуни кўрсатадики, коммунал хизматлар билан боғлиқ ҳар қандай келишмовчиликни ҳиссиёт билан эмас, балки ҳуқуқий асосда ҳал қилиш муҳимдир. Фуқаро мурожаати қабул қилиниши, ваколатли ташкилотга расмий сўров юборилиши, жавоб хати олиниши ва натижа юзасидан истеъмолчига ёзма жавоб берилиши мурожаатларни кўриб чиқишнинг қонуний механизми самарали ишлаётганини кўрсатади.

Агар сиз ҳам ичимлик суви, электр энергияси, табиий газ, чиқинди хизматлари ёки бошқа коммунал хизматлар бўйича асоссиз ҳисоб-китоб, хизматнинг узилиши ёки сифатсиз хизмат кўрсатилишига дуч келсангиз:

– барча тўлов ҳужжатлари ва шартномаларни сақланг;
– мурожаатингизни ёзма ёки электрон шаклда расмийлаштиринг;
– зарурат туғилганда Ўзбекистон истеъмолчилар ҳуқуқларини ҳимоя қилиш жамиятлари федерацияси ва унинг ҳудудий ташкилотларига мурожаат қилинг.

Қонуний мурожаат ва ҳужжатлар асосида олиб борилган ўрганиш кўплаб низоларни судгача ҳал этиш имконини беради. Фуқароларнинг ҳуқуқий фаоллиги эса хизмат кўрсатувчи ташкилотлар фаолиятида очиқлик ва масъулиятни янада оширишга хизмат қилади.