Ичимлик суви таъминоти корхоналарида ўтказилган ўрганиш натижалари бўйича жамлама таҳлилий маълумот

Ҳудудий бирлашма томонидан коммунал хизматлар соҳасида истеъмолчилар ҳуқуқларининг таъминланиши, аҳолига хизмат кўрсатиш сифати ва очиқлиги ҳолатини ўрганиш мақсадида Фарғона вилоятидаги ичимлик суви таъминоти корхоналари фаолияти бўйича ўрганиш ўтказилди.

Ўрганиш натижаларига кўра, аксарият ҳудудларда истеъмолчиларни қабул қилиш учун махсус жойлар, ўтириш жойлари, ичимлик суви ва оқова сув хизматлари кўрсатиш қоидалари, тарифлар ҳамда тўлов тартиби ҳақида маълумотлар мавжудлиги, сув ҳисоблагичларини ўрнатиш, пломбалаш ва далолатномаларни расмийлаштириш тартиблари йўлга қўйилгани аниқланган.
Шу билан бирга, айрим туман ва шаҳарларда истеъмолчиларга ахборот бериш, мурожаатлар билан ишлаш, ногиронлиги бўлган шахслар учун шароит яратиш ҳамда истеъмолчилар ҳуқуқларига оид маълумотларни очиқлаштириш бўйича камчиликлар мавжуд.

1. Истеъмолчиларга ахборот бериш ва қабул қилиш шароитлари

Қўқон шаҳри ва Ёзёвон туманида истеъмолчиларни қабул қилиш вақти ҳамда масъул ходимлар ҳақида маълумотларнинг мавжуд эмаслиги қайд этилган.
Мурожаат қилиш тартиби Қўқон шаҳри, Фарғона ва Ёзёвон туманларида кўрсатилмаган.
Ишонч телефони мавжудлиги бўйича Фарғона ва Қўқон шаҳарларида камчилик аниқланган.
Ногиронлиги бўлган шахслар учун тегишли шароитлар Фарғона шаҳри, Ёзёвон, Қўштепа ва Ўзбекистон туманларида мавжуд эмаслиги қайд этилган.

2. Истеъмолчилар ҳуқуқлари ҳақида хабардорлик

Ўрганишда эътиборли жиҳатлардан бири — «Истеъмолчиларнинг ҳуқуқларини ҳимоя қилиш тўғрисида»ги Қонун ҳақида маълумот мавжудлиги билан боғлиқ ҳолатдир.
Мазкур талаб Фарғона ва Қўқон шаҳарлари, Фарғона, Қува, Ёзёвон ҳамда Учкўприк туманларида таъминланмаган.
Шунингдек, истеъмолчига хизматнинг сифати ва параметрлари ҳақида маълумот бериш бўйича Қўқон шаҳри, Қува ва Ёзёвон туманларида камчиликлар мавжудлиги аниқланган.

3. Ичимлик суви сифати ва таъминоти узлуксизлиги

Сув сифатига оид маълумотларни истеъмолчиларга тақдим этиш масаласида Ёзёвон туманида камчилик қайд этилган.
Сув таъминотидаги узилишларни қайд этиш тизими ҳам Ёзёвон туманида тўлиқ йўлга қўйилмаган.
Режали таъмирлаш ишлари ҳақида аҳолини олдиндан хабардор қилиш ҳамда узилишлар давомийлигини ҳисобга олиш бўйича Ўзбекистон туманида камчиликлар мавжуд.
Авария ҳолатларида истеъмолчиларни хабардор қилиш механизми Қўқон шаҳрида, зарур ҳолларда муқобил сув етказиб бериш чоралари эса Фарғона шаҳрида мавжуд эмаслиги кўрсатилган.

4. Оқова сув хизматлари

Оқова сув тизимидаги авариялар, тармоқдаги тиқилишлар бўйича мурожаатларни бартараф этиш ва оқова сув хизматлари учун ҳисоб-китобларни алоҳида юритиш масалалари бўйича Учкўприк ва Ўзбекистон туманларида айрим саволларга жавоб берилмаган.
Оқова сув чиқиндиларининг кўча ёки аҳоли яшаш ҳудудига чиқиб кетиши ҳолатларини таҳлил қилиш бўйича эса Қўқон ва Марғилон шаҳарларида камчилик аниқланган.

5. Мурожаатлар билан ишлаш

Мурожаатларни қайд этиш тизими ҳамда мурожаатларга жавоб бериш муддатларини назорат қилиш бўйича Ёзёвон туманида камчиликлар қайд этилган.
Қайта мурожаатларни таҳлил қилиш тизими эса Қўқон шаҳрида мавжуд эмаслиги кўрсатилган.
Туман ва шаҳарлар кесимида умумий ҳолат
Ўрганиш натижаларида нисбатан яхши кўрсаткичлар Тошлоқ, Олтиариқ, Риштон, Бағдод, Данғара ва Бешариқ туманларида қайд этилган бўлиб, жадвалдаги саволлар бўйича «йўқ» жавоблари аниқланмаган.
Марғилон шаҳрида — 1 та, Қўштепа туманида — 1 та, Учкўприк туманида — 1 та аниқ камчилик қайд этилган.
Фарғона тумани ва Қува туманида 2 тадан, Ўзбекистон туманида 3 та, Фарғона шаҳрида 4 та камчилик аниқланган.
Энг кўп камчиликлар Қўқон шаҳрида — 9 та ва Ёзёвон туманида — 10 та савол бўйича қайд этилган.

Хулоса

Умуман, ўрганиш натижалари ичимлик суви таъминоти соҳасида истеъмолчиларга хизмат кўрсатишнинг асосий ташкилий механизмлари аксарият ҳудудларда шаклланганини кўрсатмоқда. Бироқ истеъмолчиларга ахборот бериш, мурожаатлар билан ишлаш, ногиронлиги бўлган шахслар учун қулай шароит яратиш, сув таъминотидаги узилишлар ҳақида олдиндан хабардор қилиш ва истеъмолчилар ҳуқуқларига оид маълумотларни очиқ жойлаштириш йўналишларида айрим тизимли камчиликлар мавжуд.
Айниқса, Ёзёвон тумани ва Қўқон шаҳрида аниқланган камчиликлар комплекс равишда таҳлил қилиниб, истеъмолчиларга хизмат кўрсатиш сифати ва ахборот очиқлигини ошириш бўйича амалий чора-тадбирлар белгилаш мақсадга мувофиқ.
Шунингдек, ўрганишда аниқланган камчиликларни бартараф этиш, истеъмолчиларнинг ҳуқуқ ва қонуний манфаатларини таъминлаш ҳамда коммунал хизматлар соҳасида очиқлик ва жавобгарликни кучайтириш юзасидан тегишли ташкилотларга таклифлар киритиш мақсадга мувофиқ.