Ishonch telefoniga qilingan murojaat ortidan xonadonga suyultirilgan gaz yetkazib berildi

Kundalik hayotda aholining kommunal xizmatlardan o‘z vaqtida va sifatli foydalanishi muhim ahamiyatga ega. Ayniqsa, suyultirilgan gaz bilan ta’minlashdagi uzilishlar oilalarning kundalik turmushiga bevosita ta’sir ko‘rsatishi mumkin. Bunday vaziyatlarda muammoni chetdan kuzatib turish emas, balki o‘z huquq va manfaatlarini himoya qilishning qonuniy mexanizmlaridan to‘g‘ri foydalanish muhim.

Ana shunday holatlardan biri Oltiariq tumanida kuzatildi.

Fayziobod mahallasida yashovchi fuqaro xonadonga suyultirilgan gaz o‘z vaqtida yetkazib berilmayotganidan norozi bo‘lib, O‘zbekiston iste’molchilar huquqlarini himoya qilish jamiyatlari federatsiyasining 1091 qisqa raqamli ishonch telefoniga murojaat qildi.

Fuqaroning murojaati Oltiariq tuman iste’molchilar huquqlarini himoya qilish jamiyati tomonidan belgilangan tartibda ko‘rib chiqildi. Murojaatni har tomonlama va xolisona o‘rganish maqsadida tegishli mutasaddi tashkilot — gaz ta’minoti xizmati bilan hamkorlikda amaliy ishlar olib borildi.

O‘rganish jarayonida fuqaro xonadonga suyultirilgan gaz o‘z vaqtida yetkazib berilmagani haqidagi e’tiroz o‘z tasdig‘ini topdi.

Masala e’tiborsiz qoldirilmadi. Tegishli choralar ko‘rilishi natijasida xonadondagi maishiy gaz baloni almashtirilib, fuqaroning murojaati ijobiy hal etildi. Shu bilan birga, hududdagi boshqa aholi xonadonlariga ham belgilangan reja-jadval asosida suyultirilgan gaz yetkazib berish ishlari amalga oshirilgani qayd etildi.

Ba’zan fuqarolarda: «Murojaat qilsam ham natija bo‘lmaydi», degan tushuncha uchraydi. Aslida esa muammoni qonuniy va belgilangan tartibda ko‘tarish uni hal qilishga qaratilgan muhim qadamdir.

Mazkur holat ham buning amaliy misoli bo‘ldi. Fuqaro o‘z muammosi yuzasidan 1091 ishonch telefoniga murojaat qildi. Murojaat o‘rganildi, tegishli tashkilotlar bilan hamkorlikda holatga oydinlik kiritildi va natijada xonadon suyultirilgan gaz bilan ta’minlandi.

Har bir iste’molchi tovar xarid qilish yoki xizmatdan foydalanish jarayonida o‘z qonuniy huquq va manfaatlariga daxldor muammoga duch kelishi mumkin. Bunday paytda muammoni yechimsiz deb hisoblash yoki kutib o‘tirish o‘rniga, uni qonuniy tartibda hal qilish imkoniyatlaridan foydalanish maqsadga muvofiq.

Oltiariq tumanidagi mazkur murojaat yana bir bor shuni ko‘rsatdiki: iste’molchining asosli e’tirozi e’tiborsiz qolmasligi, o‘rganilishi va uni bartaraf etish uchun amaliy choralar ko‘rilishi muhim.

Agar siz ham tovar yoki xizmat bilan bog‘liq muammoga duch kelgan bo‘lsangiz, huquqingizni himoya qilishdan tortinmang. Murojaatingiz muammoning amaliy yechimiga qadam bo‘lishi mumkin.

O‘zbekiston iste’molchilar huquqlarini himoya qilish jamiyatlari federatsiyasining 1091 qisqa raqamli ishonch telefoni orqali murojaat qilishingiz mumkin.