Elektr energiyasi iste’molchilar o‘rtasida o‘tkazilgan so‘rovnoma natijalari

Hududiy birlashma tomonidan aholiga elektr energiyasi yetkazib berish sifati, elektr ta’minotidagi uzilishlar, kuchlanish holati, hisob-kitoblarning tushunarliligi, asossiz qarzdorlik, murojaatlarni ko‘rib chiqish samaradorligi hamda iste’molchilarning umumiy qoniqish darajasini o‘rganish maqsadida so‘rovnoma o‘tkazildi.

So‘rovnoma natijalariga ko‘ra, 350 nafar respondentning javoblari tahlil qilindi. Umuman olganda, hududlar kesimida elektr ta’minoti holati bir xil emasligi, ayrim tumanlarda xizmatdan qoniqish yuqori bo‘lsa, boshqa hududlarda elektr uzilishlari va kuchlanish bilan bog‘liq muammolar mavjudligi aniqlandi.

Elektr ta’minoti uzluksizligi bo‘yicha 207 nafar respondent elektr energiyasi deyarli uzluksiz yetkazib berilishini bildirgan. Biroq 128 nafar iste’molchi elektr energiyasi vaqti-vaqti bilan uzilishini, 12 nafari tez-tez, 3 nafari esa juda ko‘p uzilishlar kuzatilishini qayd etgan. Ayniqsa, Rishton tumani, Marg‘ilon shahri, Quvasoy shahri, O‘zbekiston va Oltiariq tumanlarida uzilishlar bilan bog‘liq holatlar nisbatan ko‘proq qayd etilgan.

Elektr energiyasi uzilishlarining davomiyligi bo‘yicha ham farqli holatlar mavjud. Ayrim hududlarda uzilishlar asosan 30 daqiqagacha davom etgan bo‘lsa, Quvasoy shahrida 2–6 soat va hatto 6 soatdan ortiq, Bag‘dod tumanida esa so‘rovda qatnashganlarning barchasi 6 soatdan ortiq davom etadigan uzilishlarni qayd etgan.

Elektr tarmog‘idagi kuchlanish holati bo‘yicha eng jiddiy ko‘rsatkichlar Quvasoy shahri, Beshariq va Uchko‘prik tumanlarida kuzatilgan. Xususan, Quvasoy shahrida 50 nafardan 49 nafari, Beshariq tumanida esa barcha 49 nafar respondent kuchlanishning past yoki yuqori bo‘lish holatini qayd etgan. Uchko‘prik tumanida ham 20 nafarning barchasi kuchlanish muammosi mavjudligini bildirgan. Bu holat elektr ta’minoti sifati va maishiy texnika xavfsizligi nuqtai nazaridan alohida e’tibor talab qiladi.

Iste’molchilarni elektr uzilishlari haqida ogohlantirish masalasida 195 nafar respondent doimo, 119 nafari ba’zan ogohlantirilishini bildirgan. Biroq 14 nafar iste’molchi deyarli hech qachon ogohlantirilmasligini, 22 nafar esa bu borada aniq ma’lumotga ega emasligini qayd etgan. Demak, axborot berish tizimini yanada takomillashtirish zarur.

Hisob-kitoblar va hisoblagich ko‘rsatkichlari bo‘yicha umumiy holat ijobiy. 343 nafar respondent elektr energiyasi uchun hisob-kitobni tushunish osonligini bildirgan. 326 nafar iste’molchi hisoblagich ko‘rsatkichi real iste’molga mos kelishini qayd etgan. Shu bilan birga, 12 nafar iste’molchining hisoblagich ko‘rsatkichiga shubhasi borligi, yana 12 nafarda ko‘rsatkich real iste’molga mos emasligi qayd etilgan.

Asossiz qarzdorlik masalasida 12 nafar respondent bunday holatga duch kelganini bildirgan. Ularning aksariyati O‘zbekiston tumanida, shuningdek Quvasoy, Oltiariq va Dangara tumanlarida qayd etilgan.

Elektr ta’minoti bo‘yicha murojaatlar ham hududlar kesimida farq qiladi. Jami 96 nafar respondent elektr ta’minoti bo‘yicha murojaat qilgan. Murojaatlar ulushi Rishton, Marg‘ilon, Beshariq va O‘zbekiston tumanlarida yuqori. Murojaat qilganlarning aksariyati javob o‘z vaqtida berilganini va muammo amalda bartaraf etilganini bildirgan bo‘lsa-da, ayrim hududlarda qisman hal etilgan murojaatlar ham mavjud.

Qoniqish darajasi bo‘yicha 350 nafar respondentdan 152 nafari xizmatni 5 ball, 129 nafari 4 ball bilan baholagan. Shu bilan birga, 26 nafar 3 ball, 1 nafar 2 ball va 22 nafar iste’molchi 1 ball bergan. Eng past baholar, xususan, Uchko‘prik tumanida jamlangan: 20 nafar respondentning barchasi elektr ta’minoti xizmatini 1 ball bilan baholagan. Bu mazkur hududdagi elektr ta’minoti holatini alohida o‘rganish zarurligini ko‘rsatadi.

Xulosa

So‘rovnoma natijalari elektr energiyasi ta’minoti bo‘yicha umumiy holat ayrim hududlarda qoniqarli bo‘lsa-da, elektr uzilishlari, kuchlanishning past-yuqoriligi, aholini oldindan xabardor qilish va murojaatlarni to‘liq hal etish masalalarida hududlar o‘rtasida sezilarli farq borligini ko‘rsatdi.

Ayniqsa, Quvasoy shahri, Rishton, Beshariq, Uchko‘prik, Bag‘dod va O‘zbekiston tumanlarida qayd etilgan holatlarni tegishli elektr ta’minoti tashkilotlari ishtirokida alohida o‘rganish, muammolarning sabablarini aniqlash va ularni bartaraf etish bo‘yicha amaliy chora-tadbirlar ishlab chiqish maqsadga muvofiq.

Shuningdek, so‘rovnoma natijalaridan iste’molchilar murojaatlari va jamoatchilik nazorati ishlarida foydalanish, tizimli muammolar bo‘yicha tegishli tashkilotlarga asoslantirilgan takliflar kiritish tavsiya etiladi.