Kafolatli ta’mirda iste’molchi manfaati himoya qilindi va nosoz telefon soz holatda egasiga qaytarildi

Bugungi kunda mobil telefonlar kundalik hayotimizning ajralmas qismiga aylangan. Shu sababli xarid qilingan qurilmada nosozlik yuzaga kelganda iste’molchi uning tezkor va sifatli ta’mirlanishini yoki qonunchilikda belgilangan tartibda huquqlarining ta’minlanishini kutadi. Biroq ayrim hollarda servis markazlari ta’mirlash muddatlari bo‘yicha aniq ma’lumot bermasligi yoki iste’molchini uzoq vaqt kutishga majbur qilishi noroziliklarga sabab bo‘lmoqda.

Shunday murojaatlardan biri Farg‘ona shahrida ham ijobiy hal etildi.

Quva tumani, Istiqlol ko‘chasida yashovchi fuqaro R.Ya. O‘zbekiston iste’molchilar huquqlarini himoya qilish jamiyatlari federatsiyasining 1091 qisqa raqami orqali murojaat qilib, o‘zining HONOR X7D rusumli mobil telefoni kafolat muddati davomida nosoz holatga kelgani sababli servis markaziga topshirilganini, biroq telefon qachon ta’mirlanishi haqida aniq ma’lumot berilmayotganidan norozi ekanini ma’lum qildi.

Murojaat Farg‘ona shahar iste’molchilar huquqlarini himoya qilish jamiyati tomonidan nazoratga olinib, HONOR SERVIS MChJ rahbari nomiga rasmiy so‘rov xati yuborildi. Unda mobil telefonning ayni paytdagi texnik holati, nosozlik sabablari, amalga oshirilgan ishlar hamda ta’mirlash muddati haqida batafsil ma’lumot taqdim etilishi so‘raldi.

Servis markazi tomonidan taqdim etilgan texnik xulosaga ko‘ra, qurilmani diagnostika qilish jarayonida asosiy plata va pastki platada qisqa tutashuv izlari aniqlangan. Mutaxassislarning fikricha, bunday holat sifatsiz elektr ta’minoti yoki qurilmani zaryadlash vaqtida elektr tarmog‘idagi kuchlanishning o‘zgarishi oqibatida yuzaga kelgan bo‘lishi mumkin. Shuningdek, telefonni ta’mirlash uchun zarur ehtiyot qismlar Toshkent shahridagi servis markazidan olib kelinishi talab etilgani, barcha ehtiyot qismlar kafolat asosida bepul almashtirilgani va ta’mirlash ishlari yakunlangani ma’lum qilingan.

Farg‘ona shahar iste’molchilar huquqlarini himoya qilish jamiyati tomonidan o‘tkazilgan o‘rganish yakunlariga ko‘ra, servis markazi zarur texnik ishlarni yakunlab, HONOR X7D mobil telefonini to‘liq soz holatga keltirdi.

Natijada telefon egasiga ishchi holatda qaytarildi va iste’molchining murojaati ijobiy hal etildi. Bu esa iste’molchilar huquqlarini himoya qilish jamiyatlarining amaliy ko‘magi orqali fuqarolarning qonuniy manfaatlarini qisqa muddatlarda tiklash mumkinligini yana bir bor namoyon etdi.

Agar xarid qilgan maishiy texnika yoki mobil qurilma kafolat muddati davomida nosoz holatga kelsa:

– kafolat taloni va xarid hujjatlarini saqlang;
– qurilmani faqat vakolatli servis markaziga topshiring;
– ta’mirlash jarayoni va muddati haqida yozma ma’lumot talab qiling;
– huquqlaringiz buzilgan deb hisoblasangiz, iste’molchilar huquqlarini himoya qilish jamiyatlariga murojaat qiling.