Iste’molchilar huquqlarini himoya qilishda raqamlashtirish imkoniyatlaridan samarali foydalanish masalalari muhokama qilindi

O‘zbekiston iste’molchilar huquqlarini himoya qilish jamiyatlari federatsiyasi Farg‘ona viloyat hududiy birlashmasi tomonidan tarkibidagi 19 ta tuman va shahar jamiyatlarida faoliyat yuritayotgan huquqiy himoya mutaxassislari ishtirokida “Iste’molchilar huquq va manfaatlarini himoya qilishda internet texnologiyalari yutuqlari va raqamlashtirishdan foydalanish – dolzarb vazifa” mavzusida o‘quv-seminar tashkil etildi.

Tadbirdan ko‘zlangan asosiy maqsad iste’molchilar murojaatlari bilan ishlash samaradorligini yanada oshirish, huquqiy himoya sohasida yagona yondashuvni shakllantirish, raqamli texnologiyalardan keng foydalanish hamda amaldagi qonunchilik normalarini to‘g‘ri qo‘llash bo‘yicha mutaxassislarning bilim va ko‘nikmalarini mustahkamlashdan iborat bo‘ldi.

Seminar davomida ijro intizomini ta’minlash, fuqarolar murojaatlarini o‘z vaqtida ko‘rib chiqish, ularni hal etishda qonunchilik talablariga qat’iy rioya qilish, elektron hujjat aylanmasi, internet platformalari va zamonaviy axborot texnologiyalarining afzalliklari xususida atroflicha fikr almashildi. Shuningdek, iste’molchilarning buzilgan huquqlarini tiklashda sudgacha bo‘lgan tartib-taomillar hamda sud amaliyotidan samarali foydalanish masalalari yuzasidan amaliy tavsiyalar berildi.

Tadbirda har bir tuman va shahar jamiyatlari tomonidan joriy yilning o‘tgan davri mobaynida amalga oshirilgan ishlar, aholi murojaatlari bilan ishlash holati, iste’molchilar manfaatlarini himoya qilish borasida erishilgan natijalar hamda mavjud muammolar haqida axborotlar tinglandi. Xususan, murojaatlarni hal etish, iste’molchilarga yetkazilgan moddiy zararlarni qoplatish, huquqiy maslahatlar berish, jamoatchilik monitoringlari o‘tkazish va aholining huquqiy savodxonligini oshirish bo‘yicha olib borilayotgan ishlar muhokama qilindi.

Shu bilan birga, hududlarda raqamli imkoniyatlardan foydalanish darajasi, murojaatlarni elektron shaklda qabul qilish va hisobini yuritish, ijtimoiy tarmoqlar orqali aholi bilan muloqot qilish amaliyoti tahlil qilinib, bu boradagi ilg‘or tajribalarni ommalashtirish yuzasidan takliflar bildirildi.

Seminar ishtirokchilari tomonidan iste’molchilar huquqlarini himoya qilish sohasida raqamlashtirish jarayonlarini yanada kengaytirish, murojaatlarni ko‘rib chiqish muddatlarini qisqartirish, elektron ma’lumotlar bazalarini takomillashtirish hamda zamonaviy internet texnologiyalaridan samarali foydalanish bugungi kunning muhim vazifalaridan biri ekani alohida ta’kidlandi.

Tadbir yakunida huquqiy himoya mutaxassislariga kelgusidagi faoliyatda qonunchilik normalarini amaliyotga samarali tatbiq etish, aholi bilan ishlashda ochiqlik va tezkorlikni ta’minlash, raqamli texnologiyalar imkoniyatlaridan keng foydalanish bo‘yicha tegishli tavsiya va topshiriqlar berildi. Seminar ishtirokchilari mazkur tadbir sohadagi tajriba almashinuvini kuchaytirish, iste’molchilar huquq va manfaatlarini himoya qilish samaradorligini yanada oshirishga xizmat qilishini ta’kidladilar.