Farg‘ona viloyatida tashqi yozuvlar va reklama matnlari jamoatchilik nazorati tartibida tahlil qilindi (infografika va video)

O‘zbekiston iste’molchilar huquqlarini himoya qilish jamiyatlari federatsiyasi Farg‘ona viloyati hududiy birlashmasi tomonidan tashqi yozuvlar, peshlavhalar, reklama va boshqa axborot matnlarining davlat tili hamda reklama to‘g‘risidagi qonunchilik talablariga muvofiqligi yuzasidan o‘tkazilgan jamoatchilik monitoringi natijalari yuzasidan ma’lumot.

Brifing spikeri: Islom Ilxomov – hududiy birlashma mutaxassisi

O‘zbekiston iste’molchilar huquqlarini himoya qilish jamiyatlari federatsiyasi Farg‘ona viloyat hududiy birlashmasi tomonidan tasdiqlangan hamda Raqobatni rivojlantirish va iste’molchilar huquqlarini himoya qilish qo‘mitasi Farg‘ona viloyat hududiy boshqarmasi bilan kelishilgan jamoatchilik nazorati tadbirlarini o‘tkazish rejasi asosida, joriy yilning 9–23 iyun kunlari davomida viloyat hududida tashqi yozuvlar, peshlavhalar, reklama va boshqa axborot matnlarining davlat tili hamda reklama to‘g‘risidagi qonunchilik talablariga muvofiqligi yuzasidan jamoatchilik monitoringi o‘tkazildi.

Monitoring dasturiga muvofiq kuzatuvlar savdo ob’ektlari, dorixonalar, xususiy tibbiyot muassasalari, o‘quv markazlari, umumiy ovqatlanish ob’ektlari, bank va moliyaviy tashkilotlar hamda maishiy xizmat ko‘rsatish ob’ektlarida amalga oshirildi. Asosiy maqsad iste’molchilarning to‘g‘ri va tushunarli axborot olish huquqining ta’minlanganlik darajasini baholash, mavjud muammo va kamchiliklarni aniqlash hamda ularni bartaraf etish bo‘yicha takliflar ishlab chiqishdan iborat bo‘ldi.

Monitoring jarayonida jami 196 ta xo‘jalik yurituvchi sub’ekt faoliyati o‘rganildi.

Tahlillar:

– 167 ta yoki 85,2 foiz ob’ektda tashqi yozuvlar va peshlavhalar davlat tilida to‘liq berilganligini;
– 8 ta yoki 4,1 foiz ob’ektda tashqi yozuvlarni to‘liq davlat tilida tavqdim qilinishida qisman kamchiliklar mavjudligini;
– 21 ta yoki 10,7 foiz ob’ektda amaldagi tartib-qoidalarga rioya etilmaslik holatlari mavjudligini ko‘rsatdi.

Tashqi yozuvlarda chet tillardan foydalanilgan holatlar tahliliga ko‘ra:

– 57 ta ob’ektda davlat tilidagi muqobil axborot mavjudligi;
– 9 ta ob’ektda ushbu talablar qisman ta’minlanganligi;
– 55 ta ob’ektda davlat tilidagi muqobil axborot mavjud emasligi kuzatildi;

Imlo, uslubiy va grammatik jihatdan:

– 28 ta ob’ektda joylashtirilgan tashqi yozuvlarda imlo, grammatik yoki uslubiy xatoliklar mavjudligi qayd qilingan.

Reklama mazmuni bo‘yicha:

– 5 ta holatda reklama mazmuni iste’molchini chalg‘itishi mumkinligi kuzatildi.

Iste’molchilar uchun zarur axborot taqdim etilishi yuzasidan:

– 148 ta ob’ektda ma’lumotlar to‘liq;
– 19 ta ob’ektda qisman taqdim etilgan bo‘lsa;
– 29 ta ob’ektda yetarli axborot mavjud emas.

Shuningdek:

– 78 ta ob’ektda ish vaqti ko‘rsatilmagan;
– 46 ta ob’ektda aloqa ma’lumotlari mavjud emas.
– 36 ta ob’ektda realizasiya qilinayotgan tovar (ko‘rsatilayotgan xizmatlar)ning narxlari haqida axborot ko‘rsatilmagan.

Monitoring natijalari shuni ko‘rsatdiki, viloyatdagi aksariyat tadbirkorlik sub’ektlari tashqi yozuvlarni davlat tilida rasmiylashtirish hamda reklama qonunchiligi talablariga rioya etish borasida ijobiy natijalarga erishgan. Shu bilan birga, ayrim ob’ektlarda davlat tilidan to‘liq foydalanmaslik, chet tilidagi yozuvlarga davlat tilida muqobil axborot bermaslik, imlo xatolari, ish vaqti, aloqa ma’lumotlari va narxlar haqidagi axborotlarning to‘liq joylashtirilmaganligi kabi kamchiliklar saqlanib qolmoqda.

Aniqlangan kamchiliklarni bartaraf etish maqsadida tadbirkorlik sub’ektlariga tushuntirish ishlarini kuchaytirish, davlat tili va reklama to‘g‘risidagi qonunchilik talablariga rioya etilishini ta’minlash hamda vakolatli tashkilotlar bilan hamkorlikda profilaktik chora-tadbirlarni davom ettirish maqsadga muvofiq hisoblanadi. Monitoring yakuni bo‘yicha tahliliy takliflar tayyorlanib, tegishli davlat organlariga kiritilishi belgilangan.