Пенсионернинг биринчи пенсия пули адашининг кредити учун ечиб олинди

Ёзёвон туман Истеъмолчилар ҳуқуқларини ҳимоя қилиш жамиятида туманнинг “Марказий Фарғона” маҳалла фуқаролар йиғинида истиқомат қилувчи К.Р.нинг пенсияга чиққанидан сўнг банк пластик картасига биринчи марта келиб тушган 1 267 000 сўм пулни тўлиғича унга номаълум бўлган кредит қарздорлиги учун ечиб олингани тўғрисидаги мурожаати ўрганилди.

Мурожаатда унинг пластик картасига келиб тушган пенсия пули шу йилнинг 06.06.2025 йил кунида тўлиғича ечиб олингани, суриштириб хизмат кўрсатувчи Универсалбанк Ёзёвон филиалига борганида кредит қарздорлиги учун ечиб олинганини билгани, лекин унда ҳеч қандай кредит бўлмагани маълум қилинади.

Туман жамияти томонидан ушбу масалага ойдинлик киритиш мақсадида Универсалбанк Фарғона филиалига сўров хати киритилиб, ўрганишлар олиб борилганида, ҳақиқатан ҳам Ёзёвон туманида яшовчи К.Р.га истеъмол кредити расмийлаштирилганлиги, унинг кредит тўловларидан қарздорлиги борлиги, лекин исми ҳам, шарифи ҳам бир хил бўлган ушбу фуқаро туманнинг “Қатортол” маҳалла фуқаролар йиғинида истиқомат қилиши маълум бўлди. Ўрганиш ишлари давомида техник хатолик туфайли пенсионер К.Р.нинг банк пластик картасидан ечиб олинган 1 267 000 сўм пул тўлиғича унга қайтарилди.

Шавкатжон Саидов,
туман жамияти мутахассиси.

(фото сунъий интеллект ёрдамида тайёрланди)