Истеъмолчи банк пластик картасидан асоссиз ечиб олинган пул маблағи қайтарилди

Ёзёвон туман Истеъмолчилар ҳуқуқларини ҳимоя қилиш жамиятида туманнинг “Қатортол” маҳалла фуқаролар йиғинида яшовчи Н.Ж.нинг банк пластик картасидан унга номаълум бўлган кредит шартномаси бўйича кафиллик учун 2 272 762 сўм пул ечиб олингани тўғрисидаги мурожаати ўрганилди.

Мурожаатда маблағ унинг пластик картасидан “Yuksalish” дўконлар тармоғи Ёзёвон филиалида расмийлаштирилган кредитга кафиллик бўйича “FER RISE 15” МЧЖ томонидан ечиб олингани, ҳеч қандай кредитга кафил бўлмагани маълум қилиниб, муаммони қонуний ечим топишида амалий ёрдам кўрсатилиши сўралади.

Ўрганишда маълум бўлишича, кредит истеъмолчи Н.Ж.нинг ўртоғи А.Қ. номида бўлиб, 19.12.2023 йилда ушбу кредит расмийлаштирилаётган вақтда А.Қ. ўртоғига қўнғироқ қилиб телефонига борадиган СМС хабарномадаги паролни айтиб беришини сўраган. Ўртоғидан унчалик шубҳаланмаган Н.Ж. унга хабарнома матнини маълум қилган. А.Қ. кредит бўйича тўловларни тўлаб юрган бўлсада, кейинчалик сафарга кетиб қолиши ортидан тўловлар тўланмасдан қарздорлик йиғилиб қолган. Сотувчи эса қарздорликни сўндиришни кредит расмийлаштирилаётган вақтда А.Қ. томонидан бириктирилган барча пластик карталарга қаратган.

Мурожаатни ўрганиш ишлари давомида сотувчи масъуллари билан музокаралар олиб борилиб, шартнома имзоланиш вақтида Н.Ж. ўртоғига СМС хабарномани ихтиёрий маълум қилган бўлсада, уни А.Қ. кредит расмийлаштирилаётганидан хабардор қилмасдан алдагани, кафиллик шартномасига имзо қўймаганидан келиб чиқиб, ундан ечиб олинган пулларни қайтариш юзасидан тушунтириш ишлари олиб борилганидан сўнг, 2 272 762 сўм пул Н.Ж.га тўлиқ қайтарилишига ҳамда унинг банк пластик картаси кредит билан боғлиқ ҳужжатлардан чиқарилишига эришилди.

Шавкатжон Саидов,
туман жамияти мутахассиси.

(фото сунъий интеллект ёрдамида тайёрланди)