Заргарлик буюмларини сотиб олишда нималарга эътибор бериш керак?

Ўзбекистон қонунчилигига кўра, алоҳида жихозланган заргарлик дўкони бўлмаса, олтин, кумуш ёки қимматбаҳо тошлардан ясалган буюмларни оддий савдо дўконида сотиш мумкин эмас — яъни бу турдаги буюмлар фақат махсус заргарлик дўконлари, савдо марказларида ёки бўлим-секцияларда сотилиши мумкин.

Сотувчи бундай дўконда харидорга қуйидагиларни аниқ кўрсатиши шарт: буюмнинг номи, метали, асиллик даражаси, ишлов бериш усули, қимматбаҳо тошнинг сифати ва нархи — яъни «товар ёрлиғи» бўлиши керак.

Агар буюм Ўзбекистонда ишлаб чиқарилган бўлса, у давлатнинг асиллик даражаси тамғаси билан тамғаланиши лозим, ва агар хорижда ишлаб чиқарилиб сотиш учун келтирилган бўлса — халқаро тамғалар ёки қатор маълумотлар бўлиши зарур.

Сотувчилар учун масъулият катта: агар улар тамғалаш ёки ахборот беришда хато қилса, биринчи марта — буюм нархининг 50 % миқдорида жарима, такрорланса — 100 % миқдорида жарима ва маҳсулот мусодара қилиниши мумкин (“Қимматбаҳо металлар ва қимматбаҳо тошлар тўғрисида”ги қонун 33-моддаси).

Маслаҳат:

Заргарлик дўконига кирганда — ёрлиқ ва тамғаларни синчковлик билан текширинг. Агар ном, металл ёки асиллик кўрсатилмаган бўлса — сотиб олмаслик афзалроқ. Бу талаблар сизни алдовдан ҳимоя қилади!

Адхамжон Хамидов,
Қува туман жамияти раиси.