Автомактабда юзага келган тушунмовчилик ҳолатига ойдинлик киритилди

Кундалик ҳаётда тез-тез шартнома муносабатларига киришамиз. Шартнома олди-сотди, иш бажариш, хизматлар кўрсатиш соҳаларида ҳоҳ оғзаки шаклда бўлсин, ҳоҳ ёзма унда ҳар икки томоннинг ҳуқуқ ва мажбуриятлари келишиб олинади. Амалдаги қонунчиликка кўра, шартномага асосан ижрочи истеъмолчига муайян миқдорда ва мақбул сифатда иш бажариш ёки хизмат кўрсатиш мажбуриятини, истеъмолчи эса, шартлашилган пулни тўлаш мажбуриятини ўз зиммаларига олади. Томонлардан бирининг шартнома шартларини тўлиқ ёки қисман бажармаслиги эса шартномага оид ҳуқуқий муносабатларни издан чиқариб, турли низо ва келишмовчиликларни келиб чиқишига сабаб бўлади.

Фурқат туманилик О.А. ҳам Ўзбекистон туманида фаолият олиб борувчи автомактабда ўқиб ҳайдовчилик гувоҳномасини олиш учун талаб қилинган пул суммасини тўлаган, яъни шартнома бўйича ўз мажбуриятларини тўлиқ адо этган, лекин ўқиш тугаб имтиҳон пайти келган вақтда у гувоҳнома олишга даъвогарлар рўйхатида чиқмаган. Бу эса шартноманинг иккинчи томони ўз мажбуриятларини тўлақонли адо этмаганлигини билдиради. Шундан сўнг у жавобгарнинг ҳудудий жойлашуви бўйича Ўзбекистон туман истеъмолчилар ҳуқуқларини ҳимоя қилиш жамиятига ушбу масалага ойдинлик киритилиб, қонуний ҳал этиб берилишида амалий ёрдам кўрсатилишини сўраб мурожаат қилган.

Мурожаат асосида автомактаб маъмуриятига сўров хати киритилиб, ўрганиш ишлари давом эттирилди. Унинг якунлари билан эса автомактаб томонидан истеъмолчи билан юзага келган тушунмовчилик ҳолатига ойдинлик киритилиб, унинг қонуний асосларда ҳужжат олишида амалий ёрдам кўрсатилди.

Дилшодбек Рассаев,
жамият мутахассиси.