Табиий газ таъминоти корхоналарида ўтказилган ўрганиш натижалари бўйича жамлама таҳлилий маълумот

Ҳудудий бирлашма томонидан аҳолига табиий газ таъминоти соҳасида кўрсатилаётган хизматлар сифати, истеъмолчилар учун яратилган шарт-шароитлар, ахборот очиқлиги, шартномавий муносабатлар, ҳисоб-китоблар, мурожаатлар билан ишлаш ҳамда хавфсизлик масалалари юзасидан ўрганишлар ўтказилди.

Ўрганишлар натижасида 16 та туман (шаҳар) газ таъминоти бўлими фаолияти 36 та мезон асосида баҳоланди. Жами 576 та кўрсаткичдан 544 тасида (94,4 фоиз) ижобий ҳолат, 31 тасида (5,4 фоиз) камчилик ва 1 та ҳолатда маълумот мавжуд эмаслиги қайд этилди.

1. Истеъмолчиларга хизмат кўрсатиш ва ахборот очиқлиги

Аксарият туман (шаҳар) газ таъминоти бўлимларида истеъмолчиларни қабул қилиш учун алоҳида жой, ўтириш жойлари, масъул ходимлар ҳақида маълумот, ишонч телефони ҳамда авариявий газ хизмати телефон рақамлари мавжудлиги аниқланди.
Шу билан бирга, Фарғона ва Ёзёвон туманларида қабул вақти очиқ кўрсатилмаган.
Истеъмолчилар ҳуқуқлари ҳақида ахборот билан таъминлаш борасида ҳам айрим камчиликлар мавжуд: Фарғона шаҳри, Фарғона, Қува, Ёзёвон ва Ўзбекистон туманларида бундай маълумот мавжуд эмаслиги қайд этилган. Учкўприк туманида эса ушбу савол бўйича маълумот белгиланмаган.
Газ тарифларининг очиқ кўрсатилиши бўйича Қува ва Ўзбекистон туманларида камчилик аниқланган.

2. Истеъмолчилар учун қулай ва инклюзив шароитлар

Ногиронлиги бўлган шахсларнинг газ таъминоти бўлимига кириши ва хизматлардан фойдаланиши учун зарур шароитлар яратилиши бўйича Фарғона шаҳри, Қува ва Боғдод туманларида камчиликлар мавжудлиги қайд этилган.
Бу ҳолат истеъмолчиларга хизмат кўрсатишда тенг имкониятлар яратиш масаласига алоҳида эътибор қаратиш зарурлигини кўрсатади.

3. Газ таъминотини тўхтатиш ва қайта улаш тартиби

Газ таъминотини вақтинча тўхтатиш асослари ҳамда қайта улаш тартиби ва шартлари ҳақида ахборот бериш бўйича Фарғона, Ёзёвон ва Ўзбекистон туманларида камчиликлар аниқланган.
Мазкур маълумотларни истеъмолчилар учун очиқ ва тушунарли шаклда жойлаштириш уларнинг ҳуқуқ ва мажбуриятларини тўғри англашига хизмат қилади.

4. Шартнома ва ҳисоб-китоблар билан боғлиқ масалалар

Ўрганишларда аксарият ҳудудларда истеъмолчилар билан шартномалар тузилиши ва шартнома шартлари тушунтирилиши йўлга қўйилгани аниқланди.
Бироқ Олтиариқ туманида шартнома нусхасини олиш имконияти, Қўштепа туманида ҳисоблагичларни текшириш ва пломбалаш ҳужжатларини юритиш бўйича камчиликлар қайд этилган.
Ўзбекистон туманида эса асоссиз қарздорлик бўйича шикоятларни кўриб чиқиш механизмида камчилик мавжудлиги кўрсатилган.

5. Газ таъминотидаги узилишлар ва техник масалалар

Ўрганиш натижаларига кўра, газ таъминотидаги узилишларни қайд этиш, режали узилишлар ҳақида олдиндан хабар бериш, авариявий узилишларни ҳужжатлаштириш, узилишларни бартараф этиш муддатларини назорат қилиш ҳамда газ босими билан боғлиқ шикоятларни таҳлил қилиш каби йўналишларда асосан ижобий ҳолат қайд этилган.
Шу билан бирга, аҳоли томонидан билдирилган муаммолар таҳлилида газ босимининг пастлиги, мавсумий узилишлар ва суюлтирилган газ етказиб беришдаги кечикишлар энг кўп тилга олинган масалалар қаторида бўлган.

6. Хавфсизлик ва аҳоли билан профилактик ишлар

Газ ускуналарини техник кўрикдан ўтказишни ҳужжатлаштириш, кўрик натижаларини истеъмолчига маълум қилиш ва авариявий чақирувлар бўйича тезкорликни назорат қилиш борасида деярли барча ҳудудларда ижобий кўрсаткич қайд этилган.
Бироқ Қўқон шаҳрида газдан хавфсиз фойдаланиш бўйича аҳоли ўртасида тарғибот ишлари олиб борилиши ҳамда истеъмолчиларга хавфсизлик қоидалари бўйича ёзма ёки электрон материаллар берилиши бўйича камчиликлар қайд этилган.

7. Мурожаатлар билан ишлаш

Мурожаатларни қайд этиш журнали мавжудлиги бўйича умумий ҳолат ижобий баҳоланган. Бироқ Фарғона ва Ёзёвон туманларида мурожаатларни белгиланган муддатда кўриб чиқиш, Ўзбекистон туманида мурожаат натижасини истеъмолчига етказиш масалаларида камчиликлар аниқланган.
Шунингдек, Қўқон шаҳрида қайта мурожаатларни таҳлил қилиш, Фарғона, Ёзёвон ва Ўзбекистон туманларида эса ходимлар ҳаракатидан норози истеъмолчиларнинг шикоят қилиш механизми бўйича камчиликлар мавжуд.

8. Аҳоли томонидан билдирилган асосий муаммолар

Жадвалдаги очиқ маълумотлардан кўринишича, ҳудудларда сўнгги уч ойда энг кўп учраган муаммолар сифатида:
• газ босимининг пастлиги — Фарғона тумани ва Ёзёвон туманида;
• газ таъминотидаги мавсумий узилишлар — Қувасой шаҳрида;
• суюлтирилган газ етказиб беришдаги узилиш ва кечикишлар — Марғилон шаҳри, Фарғона ва Олтиариқ туманларида;
• асоссиз қарздорлик — Қўқон шаҳрида;
• ҳисоблагич сим-карталари билан боғлиқ муаммолар — Фарғона шаҳрида;
• мурожаатларни ўз вақтида кўриб чиқмаслик — Фарғона туманида қайд этилган.

Хулоса

Умуман, ўрганиш натижалари табиий газ таъминоти соҳасида истеъмолчиларга хизмат кўрсатиш ва улар учун ахборот очиқлигини таъминлашнинг асосий йўналишлари бўйича ҳолат асосан қониқарли эканини кўрсатмоқда. Бироқ аниқланган камчиликлар, айниқса истеъмолчилар ҳуқуқлари ҳақида ахборот бериш, ногиронлиги бўлган шахслар учун қулай шароит яратиш, газ тарифлари ва таъминотни тўхтатиш-қайта улаш тартибларини очиқлаш, мурожаатларни ўз вақтида кўриб чиқиш ҳамда шикоятлар билан ишлаш масалаларида тизимли чоралар кўриш зарурлигини кўрсатади.
Шунингдек, аҳоли томонидан билдирилган газ босими, таъминотдаги узилишлар, суюлтирилган газ етказиб бериш ва асоссиз қарздорлик каби масалалар алоҳида назоратга олиниб, уларнинг сабабларини ҳудудлар кесимида таҳлил қилиш мақсадга мувофиқ.