Farg‘ona davlat texnika universitetida ochiq muloqot tadbiri bo‘lib o‘tdi

O‘zbekiston iste’molchilar huquqlarini himoya qilish jamiyatlari federatsiyasi Farg‘ona viloyat hududiy birlashmasi joriy yil asosiy faoliyat yo‘nalishlari rejasining 6.2-bandiga ko‘ra tuman va shahar jamiyatlari uchun malakali kadrlar zaxirasini shakllantirish, mavjud bo‘sh ish o‘rinlarini munosib mutaxassislar bilan to‘ldirish maqsadida oliy ta’lim muassasalarida bitiruvchi talabalar ishtirkoida ochiq muloqot tarzidagi tadbirlarni tashkillash va o‘tkazish belgilangandi. Bugun Farg‘ona davlat texnika universiteti Ishlab chiqarishda boshqaruv fakultetida o‘tkazilgan tadbir jumlasidandir.

Tadbirda hududiy birlashma raisi Ahrorjon Raxmonaliyev, mas’ul xodimlar, professor-o‘qituvchilar hamda bitiruvchi talabalar ishtirok etdi. Uchrashuv davomida yoshlarga Federatsiya tizimida amalga oshirilayotgan islohotlar, iste’molchilar huquqlarini himoya qilish borasidagi ustuvor vazifalar, tuman va shahar jamiyatlari faoliyati hamda tizimda faoliyat yuritayotgan mutaxassislar zimmasiga yuklatilgan mas’uliyat haqida batafsil ma’lumot berildi.

Shuningdek, bitiruvchilarga hududiy birlashma va uning tarkibidagi tuman hamda shahar jamiyatlarida mavjud vakant ish o‘rinlari, ishga qabul qilish tartibi, nomzodlarga qo‘yiladigan talablar, mehnat sharoitlari hamda yosh mutaxassislar uchun yaratilayotgan imkoniyatlar yuzasidan tushunchalar berildi. Talabalarni qiziqtirgan savollarga mutaxassislar tomonidan batafsil javob qaytarildi.

Ta’kidlanganidek, bugungi kunda iste’molchilar huquqlarini ishonchli himoya qilish, murojaatlar bilan samarali ishlash, huquqiy targ‘ibotni kuchaytirish va jamoatchilik nazoratini rivojlantirishda bilimli, tashabbuskor hamda zamonaviy fikrlaydigan yosh kadrlarga ehtiyoj ortib bormoqda. Shu bois oliy ta’lim muassasalari bilan hamkorlikni yanada mustahkamlash, iqtidorli bitiruvchilarni tizimga jalb etish muhim ahamiyat kasb etadi.

Tadbir doirasida ishtirokchilar hududiy birlashma faoliyati, amalga oshirilayotgan loyihalar, iste’molchilar murojaatlarini ko‘rib chiqish amaliyoti hamda tizimning istiqboldagi rivojlanish yo‘nalishlari bilan yaqindan tanishtirildi.

Mazkur tadbir yosh mutaxassislarning kasbiy salohiyatini qo‘llab-quvvatlash, ularni doimiy ish bilan ta’minlashga ko‘maklashish hamda Federatsiya tizimi uchun istiqbolli kadrlar zaxirasini shakllantirish yo‘lidagi muhim qadamlardan biri bo‘ldi.