Uzoq muddat foydalaniladigan tovarga kafolat muddati belgilanmagan bo‘lsa-da, iste’molchi qonuniy huquqlarini ro‘yobga chiqara oladi

Toshloq tuman iste’molchilar huquqlarini himoya qilish jamiyatida «Konizar» mahalla fuqarolar yig‘ini hududida yashovchi K.I.ning 1 000 000 so‘mga sotib olingan mobil telefon apparatini hech qancha ishlatilmasdan ishdan chiqqanligi va uning ushbu holatni bartaraf etish yuzasidan sotuvchiga qo‘ygan qonuniy talablari bajarilmayotganligi xususidagi murojaati o‘rganildi.

Iste’molchi murojaatida ITEL A50 rusumidagi mobil telefon apparatini 2024 yilning dekabr oyi oxirlarida tuman buyum bozori hududidagi do‘kondan xarid qilganligini, telefon bir hafta ishlatilmasdan ekrani kuyib qolganligini, uni almashtirish yoki bepul ta’mirlatib berish yoxud pulini qaytarish kabi talablari bilan sotuvchiga murojaat qilganida, u mazkur telefon apparatiga kafolat muddati belgilanmagani aytib, shu sababli iste’molchining talablarini qanoatlantira olmasligini ma’lum qilganligi bayon qilinadi hamda yuzaga kelgan holatda uning qonuniy huquqlarini himoya qilinishini so‘raydi.

Amaldagi qonunchilikka ko‘ra, o‘ziga nuqsonli tovar sotilgan iste’molchi bir qator huquqlarga ega. Tovarni maqbul sifatdagisiga almashtirilishini, undagi nuqsonlar bepul bartaraf etib berilishini, shartnoma bekor qilinib, uning tovar uchun to‘lagan puli qaytarilishini talab qilish kabi huquqlar shular jumlasidandir. Bunday holat yuz berganda, agar iste’molchiga sotilgan uzoq muddat foydalaniladigan tovarga kafolat muddati belgilanmagan bo‘lsa, u tovar xarid qilingan kundan boshlab olti oy mobaynida qonuniy huquqlarini ro‘yobga chiqarish imkoniyatiga ega bo‘ladi.

Tuman jamiyati mutaxassislari tomonidan qonunning yuqoridagi talablarini o‘zida aks ettirgan da’vo talabnomasi sotuvchiga kiritilib, mazkur talablarni bajarmaslik natijasida kelib chiquvchi huquqiy oqibatlar tushuntirilgandan so‘ng sotuvchi nuqsonli ekanligi da’vo qilingan telefon apparatini ITEL A70 rusumdagi telefon apparatiga almashtirib berib, muammoni o‘rnida bartaraf etdi.

Husnidaxon Yakubova,
tuman jamiyati mutaxassisi.