Ихтисослаштирилган мактаб ўқувчилари ҳузурида

Ҳуқуқий атамалар орасида “ҳуқуқ лаёқати” деган тушунча бўлиб, ушбу лаёқат инсон туғилганида вужудга келади ва инсон умрининг якунига қадар мазкур лаёқатга эга бўлади. Яна кундалик турмуш жараёнида “истеъмолчи” деган тушунча ҳам кўп ишлатилиб, истеъмолчи деб эътироф этилиши учун инсонда ҳуқуқ лаёқати мавжуд бўлиши кифоя қилади. Шу нуқтаи назардан ҳам ёшу қари, эркагу аёл – барчамиз истеъмолчимиз, дейилади.

Юқоридагилардан келиб чиққан ҳолда, Бешариқ туман истеъмолчилар ҳуқуқларини ҳимоя қилиш жамияти томонидан таълим муассасаларининг ўқувчилари – ёш истеъмолчилар билан ҳам учрашувлар ўтказиб борилиб, уларда истеъмолчиларнинг ҳуқуқларини ҳимоя қилиш тўғрисидаги қонунчилик юзасидан ҳуқуқий билимларни шакллантириш бўйича саъй-ҳаракатлар амалга ошириб келинмоқда. Тумандаги ихтисослаштирилган мактаб ўқувчилари билан ўтказилган учрашув ҳам шулар жумласидандир.

Тадбирда мактабнинг юқори синф ўқувчиларига юртимизда истеъмолчиларнинг ҳуқуқларини ҳимоя қилиш тўғрисидаги қонунчиликнинг вужудга келиши, бу борадаги қонуннинг мазмун-моҳияти ва кундалик турмуш жараёнидаги тутган ўрни ва аҳамияти тўғрисида тушунтиришлар берилиб, уларни қизиқтирган саволларга жавоблар қайтарилди.

Бахтиёр Жураев,
туман жамияти мутахассиси.