Учкўприкда иншолар танлови ғолиблари ва уларнинг устозлари тақдирланди

Учкўприкда Ўзбекистон истеъмолчилар ҳуқуқларини ҳимоя қилиш жамиятлари федерацияси ташаббуси билан умумтаълим мактабларининг юқори синф ўқувчилари ўртасида ўтказилаётган “Мен – ёш истеъмолчиман” уч босқичли республика кўрик-танловининг туман босқичи ниҳоясига етказилиб, ғолибларни тақдирлаш маросими ўтказилди.

Тақдирлаш маросими тумандаги 1-умумтаълим мактаби залида туман Мактабгача ва мактаб таълими бўлими масъуллари иштирокида ўтказилди. Маросимда сўз олганлар бу каби кўрик-танловларнинг ўқувчиларнинг маънавий камолотидаги ўрни ва аҳамияти, барчанинг истеъмолчилиги, шу нуқтаи назардан аҳолининг ёшу қари вакиллари учун истеъмол соҳасига оид билимларнинг зарурлиги каби масалалар юзасидан фикр ва мулоҳазаларини билдириб ўтдилар.

Шундан сўнг танловнинг туман босқичи якунлари маълум қилиниб, унга кўра 1-ўринни 54-умумтаълим мактаби ўқувчиси Дилафрўз Ҳасанбоева, 2-ўринни 20-умумтаълим мактаби ўқувчиси Нозима Баҳодирова, 3-ўринни эса 5-умумтаълим мактаби ўқувчиси Мубинахон Солиевалар томонидан ёзилган иншолар эгаллаганлиги эълон қилинди ҳамда ғолибларга туман жамиятининг фахрий ёрлиқ ва эсдалик совғалари топширилди. Тақдирлаш маросими доирасида нафақат унинг ғолиб иштирокчилари, балки уларнинг устозлари ҳам туман жамиятининг фахрий ёрлиқлари билан тақдирландилар.

Сардорбек Мирзажонов,
туман жамияти раиси.