Қўмитанинг вилоят ҳудудий бошқармаси сўрови асосида ўрганиш ўтказилди

Рақобатни ривожлантириш ва истеъмолчилар ҳуқуқларини ҳимоя қилиш қўмитасининг Фарғона вилоят ҳудудий бошқармаси сўрови асосида вилоятдаги савдо ва хизмат кўрсатиш объектларида истеъмолчиларга амалдаги қонунчилик талабларига мувофиқ шароитлар яратилганлиги бўйича, танлама асосда, туман (шаҳар) ҳудудида умумий овқатланиш соҳасида фаолият олиб бораётган хўжалик юритувчи субъектларда, сўровга илова қилинган саволнома асосида ўрганишлар ўтказилди.

Ўрганишлар доирасида вилоятдаги 66 та умумий овқатланиш соҳасида фаолият олиб бораётган хўжалик юритувчи субъектлар фаолияти билан танишилди. Ўрганиш натижалари, уларнинг 24 таси (36,4 % и)да корхона хақидаги маълумотлар (паспорти) истеъмолчиларга кўринарли жойга қўйилмаганлигини, 29 таси (43,9 % и)да имконияти чекланган шахслар мазкур хизматдан тўсқинликларсиз фойдаланишларига имконият яратиб беришга хизмат қилувчи пандуслар ташкилланмаганлигини, 24 таси (37,9 % и)да мижозларнинг автомобилларини қўйишлари учун автомобилларни сақлаш жойлари йўқлигини, 10 таси (15,2 % и)да эса ҳожатхоналар мавжуд эмаслигини кўрсатди.

Шунингдек, соҳада фаолият олиб бораётган субъект истеъмолчига ўзи реализация қилаётган товар (иш, хизмат)лар ҳақида ўз вақтида зарур, тўғри ва тушунарли маълумот бериши шартлиги, мазкур маъулмотлар давлат тилида тақдим этилиши лозимлигидан (бунда давлат тилида тақдим қилинган маълумот бошқа тилларда такрорланиши мумкин) келиб чиқиб, мижозлар учун таомнома (меню)ларнинг мавжудлиги кўрилганида, субъектларнинг 49 таси (74,2 % и)да таомномалар лотин шрифтига асосланган ўзбек (давлат) тилидалиги, 10 таси (15,1 % и)да кирилл шрифтига асосланган ўзбек (давлат) тилидалиги, 2 таси (3 % и)да давлат тилида берилган маълумотга қўшимча рус тилида ҳам такрорланганлиги, 1 тасида фақат рус тилида берилганлиги, 4 тасида эса таомнома (меню) мавжуд эмаслиги кузатилиб, ўрганиш якунлари асосида тайёрланган жамлама маълумот Рақобат бошқармасига киритилди.