O‘zbekiston tumanida iste’molchilar huquqlarini himoya qilish sohasidagi ishlar muhokama qilindi

O‘zbekiston tumanida iste’molchilar huquqlarini himoya qilish jamiyati hamda mahallalarda faoliyat yuritayotgan tayanch guruhlari vakillari ishtirokida yig‘ilish bo‘lib o‘tdi. Unda jamiyatning 2021–2025 yillardagi faoliyati natijalari muhokama qilinib, o‘tgan davrda amalga oshirilgan ishlar sarhisob qilindi.

Yig‘ilishda tuman jamiyatining asosiy faoliyat yo‘nalishlari — fuqarolar murojaatlari bilan ishlash, iste’molchilarning buzilgan huquqlarini tiklash, aholiga huquqiy maslahat va tushuntirishlar berish, shuningdek, iste’molchilik madaniyatini oshirishga qaratilgan targ‘ibot tadbirlari haqida axborot berildi.

Alohida ta’kidlanganidek, iste’molchilar huquqlarini samarali himoya qilish faqat murojaat kelib tushgandan keyin chora ko‘rish bilan cheklanib qolmasligi kerak. Muammolarni barvaqt aniqlash, aholining huquqiy xabardorligini oshirish va huquqbuzarliklarning oldini olish ham muhim vazifalardan hisoblanadi.

Shu nuqtai nazardan, tayanch guruhlari faollarining mahallalardagi ishtirokiga alohida baho berildi. Ular orqali aholi bilan yaqin muloqot o‘rnatish, iste’molchilarni qiynayotgan masalalarni o‘rganish va zarur hollarda ularni hal etishda tegishli tashkilotlar bilan hamkorlik qilish muhimligi qayd etildi.

Muloqot jarayonida bugungi kunda iste’molchilik munosabatlarida paydo bo‘layotgan yangi chaqiriqlar, jumladan, onlayn savdo, elektron xizmatlardan foydalanish, internet orqali xaridlarda xavfsizlik va moliyaviy hushyorlik masalalariga ham e’tibor qaratildi. Aholiga huquqiy bilim berish bilan bir qatorda, iste’molchilarning o‘z manfaatlarini mustaqil himoya qila olish ko‘nikmalarini shakllantirish zarurligi ta’kidlandi.

Yig‘ilish yakunida tuman jamiyati va tayanch guruhlari faollari oldida turgan vazifalar belgilab olinib, aholi bilan ishlashni yanada jonlantirish, huquqiy targ‘ibot qamrovini kengaytirish va har bir iste’molchining qonuniy manfaatlarini himoya qilishga qaratilgan amaliy ishlarni kuchaytirish bo‘yicha fikrlar bildirildi.

Bunday uchrashuvlar nafaqat o‘tgan faoliyatni sarhisob qilish, balki joylarda iste’molchilar huquqlarini himoya qilish tizimini yanada takomillashtirish uchun muhim muloqot maydoni bo‘lib xizmat qiladi.