«Iste’molchilar huquqlarini sudgacha va sud tartibida himoya qilish: xorijiy va mahalliy tajriba» mavzusida ochiq muloqot bo‘lib o‘tdi

Fuqarolik ishlari bo‘yicha viloyat sudi majlislar zalida O‘zbekiston iste’molchilar huquqlarini himoya qilish jamiyatlari federatsiyasi Farg‘ona viloyat hududiy birlashmasi tashabbusi bilan hamda viloyat sudi bilan hamkorlikda O‘zbekiston Respublikasi Prezidenti Administratsiyasi huzuridagi Axborot va ommaviy kommunikasiyalar agentligi rahbari hamda viloyat hokimi tomonidan tasdiqlangan media tadbirlar rejasiga asosan «Iste’molchilar huquqlarini sudgacha va sud tartibida himoya qilish: xorijiy va mahalliy tajriba» mavzusidagi ochiq muloqot bo‘lib o‘tdi. Tadbirda viloyat sudi, Raqobat boshqarmasi, O‘zNNTMA viloyat hududiy bo‘linmasi, NNTlar va OAV vakillari ishtirok etdilar.

Ochiq muloqotda mamlakatimiz bozor iqtisodi sari yuz burib borar ekan, ushbu jarayonda turli bitim va kelishuvlarga asoslangan iqtisodiy munosabatlar ham rivojlanib borishi, bu esa o‘z navbatida bu borada yuzaga keladigan turli nizolarni ham hal qilib borilishini taqozo qilishi, nizolar esa asosan ikki yo‘l bilan hal qilinib kelinayotganligi ta’kidlab o‘tilib, nizolarni sudgacha bo‘lgan jarayonlarda hal qilish va sudda hal qilish masalalarida atroflicha fikr va mulohazalar almashildi.

Tadbir doirasida Fuqarolik ishlari bo‘yicha viloyat sudi sud’yasi Sh.Tadjievning ma’ruzasi hamda sud’yalar N.Sulaymonov, M.Musaxanova, O.Jiyanov va N.Egamovlarning mavzuga oid fikr va mulohazalari tinglandi, shuningdek mamlakatimizda iste’molchilarning huquqlarini sudgacha va sud tartibida himoya qilish bo‘yicha qonunchilik bazasi yaratilganligi, shuning bilan birgalikda bu borada xorij davlatlarining ilg‘or tajribasini o‘rganish ishlari ham olib borilayotganligi ham e’tirof etib o‘tilib, iste’molchilar huquq va manfaatlarini himoya qilish, ularning bu boradagi huquqiy bilim saviyasi va iste’mol madaniyatini oshirish borasida viloyatdagi davlat va nodavlat tashkilotlari o‘rtasida yanada yaqindan hamkorlik olib borishga kelishib olindi.

Ma’lumot uchun:

O‘zbekiston iste’molchilar huquqlarini himoya qilish jamiyatlari federatsiya tizimi tashkilotlariga o‘tgan 2023 yil davomida fuqaro (iste’molchi)lardan jami 13 731 ta murojaat kelib tushgan bo‘lib, ularning 12 487 tasi, ya’ni, 90,9 foizi ijobiy hal etilishi natijasida iste’molchilar foydasiga jami 55 mlrd 442 mln 253 ming 724 so‘m yetkazilgan zarar qayta hisob-kitob qilib berilgan. Ushbu murojaatlarning 12 318 tasi yoki iste’molchilar foydasiga hal qilingan summaning 43 mlrd 213 mln 846 ming 170 so‘m qismi sudgacha bo‘lgan jarayonlarda hal qilingan bo‘lsa, 169 ta murojaat asosida iste’molchilarning manfaatlarini ko‘zlab sud organlariga da’vo arizalari kiritilishi va ijobiy hal etilishi natijasida 12 mlrd 228 mln 407 ming 554 so‘m moddiy va ma’naviy zararlar iste’molchilar foydasiga qayta hisob-kitob qilinishiga erishilgan.